“Pastrohet” kanali i Suezit-Kalojnë 85 anijet e fundit, që prisnin zhbllokimin e “Ever Given”

Rreshti me qindra anije i formuar në kanalin e Suezit, prej ngecjes së mbajtësit të kontejnerëve Ever Given, është pastruar, sipas autoriteteve egjiptiane.   Tetëdhjetë e pesë (85) anijet e fundit kaluan përmes itenerarit ditën e Shtunë, sipas Autoritetit të Kanalit të Suezit (SCA), që shtoi se ky operacion vuri në dukje aftësinë për të manaxhuar emergjencat.

Në total, 422 anije kanë kaluar që kur anija u lirua më 29 Mars, pasi kishte bllokuar kanalin për thuajse 1 Javë.  Mbajtësi i kontejnerëve Ever Given, 400 metra i gjatë, ngeci më 23 Mars në pjesën jugore të kanalit.

Rruga e ngushtë detare mundëson rreth 12% të tregtisë botërore.  Bllokimi ka ndërprerë furnizimet, që ndodheshin nën  presion edhe nga pandemia,  duke rikujtuar brishtësinë e infrastrukturës së tregtisë botërore.

Kanali manaxhon kalimin e 50 anijeve në ditë, por duhej ta rriste këtë shifër në 80-90 për të pastruar trafikun nga aksidenti.  Egjipti planifikon të kërkojë rreth 1 miliardë dollarë kompensim për humbjet nga tarifat e tranzitit dhe dëmet, sipas autoritetit të kanalit, që nuk ofroi detaje se kush duhet të ofrojë kompensim.  Anija Ever Given ndodhet në liqenin “Great Bitter”, që ndodhet në mes të kanalit.

Shumica e anijeve që prisnin ishin trasnportues të lëndëve të para dhe anije kontejnerë mbajtëse.

Klevis Llaha/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.