Pasuritë e zyrtarëve në sitë – Ligj i ri, ILDKPI do zbardhë llogaritë e politikanëve në banka
Politikanët dhe zyrtarët e lartë nuk do jenë më të mbrojtur nga konfidencialiteti i të dhënave personale që garanton sistemi bankar mbi llogaritë, depozitat apo transaksionet financiare. Është depozituar tashmë në Kuvend një draft me disa ndryshime në Ligjin “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publike”, i cili detyron bankat tu japin inspektorëve të IDKPKI çdo informacion që ata kërkojnë mbi zyrtarë të lartë apo politikanë.
Më konkretisht, Neni 4 i Projektligjit, ndryshon piken 4 të nenit 26 të ligjit aktual, dhe parashikon mundësinë që dhe inspektorët e autorizuar nga Inspektori i Përgjithshëm, t’i adresojnë kërkesë bankave të nivelit të dytë dhe subjekteve të tjera, që ushtrojnë veprimtari bankare dhe financiare ne Republikën e Shqipërisë, për të marrë të dhëna lidhur me depozitat, llogaritë dhe transaksionet e kryera nga personal që, sipas këtij ligji, kanë detyrimin për deklarim.
Ky ndryshim vjen si domosdoshmëri e funksionalitetit te sistemit elektronik (online) të deklarimit të interesave private, i cili parashikon ndërveprim me të gjithë institucionet publike dhe private nga të cilat Inspektorati i Lartë, kërkon, merr dhe administron informacion gjate procesit të kontrollit të plotë dhe/ose hetimit administrativ.
Konkretisht, me anë të mjeteve të komunikimit elektronik, inspektorët e Inspektoratit të Lartë, të ngarkuar me kryerjen e proceseave të kontrollit, do të kenë mundësi të ndërlidhen me sistemet elektronike të institucioneve publike dhe private, duke ju adresuar kërkesa lidhur me të dhënat e nevojshme për proceset e kontrollit dhe marrjen e informacionit prej tyre.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.