Pasuritë shtetërore me qira 1 euro – Qeveria “lëshon dorën”, zgjat afatet dhe ndryshon procedurat
Qeveria ka zgjatur afatet e dhënies me qira të pasurive shtetërore për shfrytëzim nga palët e treta. Kështu, nëse në ligjin e vjetër, afati maksimal për dhënie me qira për sipërfaqet mbi 500 m2 ka qenë 20 vjet, qeveria ka bërë ndryshime në vendimin e mëparshëm duke bërë përjashtime nga rasti.
Sipas vendimi të ri të botuar në Fletoren Zyrtare, për përcaktimin e kritereve, të procedurës dhe mënyrës së dhënies me qira, enfiteozë apo kontrata të tjera, përcaktohet se “në rastet kur ka një investim të rëndësishëm për vendin, që synon tërheqjen e industrive të reja dhe futjen e teknologjive të përparuara, me një nivel investimi mbi 800 milionë lekë dhe që do të sigurojë jo më pak se 500 vende pune, afati i lidhjes së kontratave të qirasë është deri në 30 vjet, me të drejtë ripërtëritjeje me afat 30-vjeçar, ndërsa afati i lidhjes së kontratave të enfiteozës është deri në 60 vjet.”
Sa i takon kontratave me tarifën 1 euro/kontrata, vendimi i ri, përcakton se “pasuritë shtetërore me sipërfaqe mbi 500 m u jepen të tretëve edhe me kontrata qiraje/ enfiteozë, me tarifën 1 euro/kontrata, me vendim, rast pas rasti, të Këshillit të Ministrave. Kështu, qeveria ka shtuar të drejtën e dhënies me enfiteozë të çdo lloj pasurie publike, ndërsa më parë, me këtë lloj procedure jepeshin vetëm pasuritë e paluajtshme të institucioneve shtetërore, ndërmarrjeve dhe shoqërive shtetërore.
Enfiteoza është një kontratë, me të cilën një personi i jepet e drejta të përdorë e të përmirësojë një pasuri të paluajtshme, kundrejt një shpërblimi periodik në të holla ose në natyrë. Pasuritë shtetërore, që jepen me qira, janë: ndërtesat, sipërfaqet funksionale (jo nën ndërtesë), trualli i lirë, makineritë e pajisjet e linjat e prodhimit të institucioneve shtetërore, ndërmarrjeve dhe shoqërive tregtare me kapital 100 për qind shtetëror (në vijim “shoqëri shtetërore”) dhe tokat e pafrytshme.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.