Pasuritë shtetërore në bregdet shkojnë tek privati – Ngrihet task-forca në Ministrinë e Turizmit

Pronat e paluajtshme shtetërore në bregdet do t’u shkojnë sipërmarrësve privatë që duan të investojnë në turizëm. Këshilli i Ministrave ka miratuar ngritjen e një task-force të veçantë në Ministrinë e Turizmit dhe Mjedisit, e cila do të merret me identifikimin dhe inventarizimin e këtyre pasurive.

Çdo objekt, truall, tokë bujqësore, pyll, livadh deri në 1.5 kilometra nga vija bregdetare, në pronësi apo administrim nga institucionet qendrore dhe vendore do të shënohet në një regjistër të posaçëm.

Më pas kjo task force do të bashkëpunojë me investitorët e interesuar dhe ministritë e institucionet e linjës, duke bërë propozime mbi përdorimin e pronave të caktuara.

Pronat me interes për privatizim në bregdet përfshijnë ish-kampe, reparte ushtarake dhe godina të vjetra që aktualisht nuk kryejnë funksion. Por duke qenë se në regjistër do të futen edhe trojet, nuk përjashtohet mundësia e dhënies në përdorim apo dhënies me qira për ngritjen e komplekseve dhe atraksioneve të tjera turistike.

Procesi pritet të vazhdojë deri në fund të verës së vitit të ardhshëm, ndërkohë që task forca do t’i raportojë kryeministrit, ministrit të turizmit dhe atij të financave.

Ngritja e kësaj njësie vjen në një moment kur drejtori i ALUIZNI, Artan Lame, ka paralajmëruar një aksion për rivlerësimin e 30 mijë parcelave në bregdet. Këto toka janë ndarë duke u konsideruar si bujqësore, ndërsa qeveria kërkon tashmë rikthimin e tyre.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.