Paundi ndjek optimizmin për Brexit – Rritet pas komenteve të Juncker për daljen me marrëveshje

Paundi britanik u rrit në sesionin e fundit të javës, duke ndjekur komentet e presidentit të Komisionit Europian Jean-Claude Juncker, i cili tha se ka besim që do arrihet një marrëveshje për Brexit.

“Mendoj se mund të arrijmë një marrëveshje. Po bëj gjithçka për arritjen e një dakordësie për shkak se po nuk ndodhi, do të ketë pasoja katastrofike për të paktën 1 vit”, tha Juncker.

Paundi u rrit me 0.7% në 1.2554 kundër dollarit amerikan. Deputetët britanikë ndodhen nën presion për të kaluar një plan për Brexit përpara se ekonomia e 5-të më e madhe në botë të dalë nga Bashkimi Europian më 31 Tetor.

Ky është edhe afati i 3 për daljen e Britanisë, pasi është shtyrë disa herë me qëllim që vendi të arrijë një marrëveshje mbi tregtinë e ardhshme me Bashkimin Europian. Kryeministri Boris Johnson ka premtuar se Tetori do të jetë afati i fundit, qoftë edhe nëse Britania del pa marrëveshje.

Deputetët  e opozitës si dhe disa konservatorë, po bashkëpunojnë që të ndalin në mënyrë ligjore Brexit pa marrëveshje.  Juncker tha se ka marrë dokumente nga Boris Johnson ku shfaqeshin idetë e një marrëveshjeje të re të Brexit.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.