Paundi thyen $1.35 – Nxitet nga Komentet e Bankës së Anglisë për tkurrjen monetare
Paundi britanik theu nivelin prej 1.35 kundër dollarit amerikan në sesionin e fundit tregtar të javës, megjithatë pasiguritë politike mund të përkeqësojnë performancën e valutës.
Sterlina shënoi nivelin më të lartë në 14 muaj, ndërkohë që tregtarët shtuan shanset e një rritje të normës bazë të interesit nga Banka e Anglisë. Në takimin e muajit Shtator, Banka e Anglisë deklaroi se normat e interesit mund të rriten në muajt që vijnë.
Më shumë anëtare të Komisionit të Politikave Monetare anuan për nisjen e tkurrjes monetare, duke thënë se një ndërhyrje mund të vijë në muajin Nëntor. Analistët thonë se komentet e zyrtarëve të institucionit kanë nxitur fuqizimin e paundit.
Një nga momentet kritike për valutën ishin zgjedhjet e muajit Qershor. Paundi ra me 2.3% në 1.2690 pas zgjedhjeve, ku partia Konservatore humbi mazhorancën në parlament.
Negociatat për Brexit kanë cenuar gjithashtu performancën e valutës, pasi zyrtarët britanikë dhe europianë kanë bërë progres të dobët në bisedime.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.