PD i qëndron marrëveshjes së 5 qershorit, Bardhi: Ndryshimet e njëanshme të mazhorancës e zhbëjnë akordin

Partia Demokratike ka reaguar menjëherë pas fjalës së kryeministrit EdI Rama në kuvend, lidhur me rikonfirmimin e mazhorancës për hapjen e listave dhe heqjen e koalicioneve parazgjedhore. Sekretari I Përgjithshëm PD, Gazment Bardhi akuzoi kryeministrin se me ndryshimet e njëanshme po zhbën marrëveshjen e 5 qershorit. Neni 68 i Kushtetutës aktualisht parashikon se:

“Kandidatët për deputetë paraqiten në nivel zone zgjedhore nga partitë politike, koalicionet zgjedhore të partive politike, si dhe nga zgjedhësit.”Përcaktimi kushtetues nuk ka asnjë dilemë për çështjen e koalicioneve. Koalicionet lejohen nga Kushtetuta, por po ndalohen nga Edi Rama për interesin e tij personal.  Faktet janë në draftin e dakordësuar dhe të firmosur nga palët sipas kësaj marrëveshje.

Sipas Bardhit  një tjetër nen i dakordësuar në marrëveshjen e 5 qershorit që zhbëhet nga ndryshimet kushtetuese të Edi Ramës është neni 36 për  kalimin e mandatit brenda për brenda koalicionit në rast të shterimit të listave .

Aty thuhet shprehimisht se “Në rastin kur është shteruar lista e kandidatëve të partisë politike, anëtare e një koalicioni, mandati i kalon partisë së koalicionit me herësin më të lartë.”Ai është i tmerruar nga humbja e pushtetit dhe rotacioni i pashmangshëm. 

Bardhi shprehet se është koha që marrëveshja të miratohet pa ndryshime, siç u firmos nga Këshilli Politik me pjesëmarrjen e të gjitha palëve politike. Çdo akt tjetër tradhëton interesin kombëtar, duke marrë peng nisjen e negociatave për anëtarësimin e Shqipërisë në Bashkimin Europian.

Nertila Doko / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.