PD kundër inceneratorëve – Basha: Rama po e kthen vendin në kazan mbeturinash
Për opozitën dhënia e lëjeve për ndërtimin e inceneratorëve në 3 qytete të vendit, është një aferë korruptive, ku i përfshirë është vetë kryeministri. Kryetari i demokratëve Lulzim Basha në një dalje për mediat, tha se organet e drejtësisë duhet të fillojnë menjëherë hetimet për këto leje që rrezikojnë ta kthejnë Shqipërinë në një kazan të madh mbeturinash.
“Paralel me projektin e kanabizimit të vendit, ka ecur me këtë projekt të kthimit të Shqipërisë në një kazan plehrash për Europën. E mbani mend të gjithë përpjekjen e tij për të kaluar ligjin mbi importin e mbetjeve, të cilin vetë e kundërshtoi kur ishte në opozitë. Së dyti sepse është një politikë e rrezikshme për shëndetin publik, ndot ajrin dhe prodhon mbetje të rrezikshme në fund të procesit. Dhe së treti sepse nuk ndikon as projektin, apo industrinë e riciklimit, që ishte një nga pretekstet për ligjin e importit. Por mbi të gjitha projektet e inceneratorëve janë zbuluar si projekte dhe afera korruptive dhe kriminale”, tha Basha.
Sipas lejeve të dhëna parashikohet ndërtimi i inceneratorëve në 3 qytete: Elbasan, Fier dhe Tiranë.
Ndërkohë, ka reaguar edhe ministri i Financave dhe Ekonomisë, Arben Ahmetaj, i cili nëpërmjet një deklarate për mediat thekson se “brenda 7 vitesh Bashkia e Elbasanit e Fierit do jenë bërë pronare të dy inceneratorëve për një kosto totale investimi dhe shërbimi prej 54 milion Euro me TVSH (dhe procedurën e pagesave për blerjen e agregateve ne Fier e ka certifikuar edhe vete Kontrolli Larte i Shtetit), ndërkohë që Elbasani ka shpëtuar, e Fieri do të shpëtojë prej helmeve te plehrave qe qeveria e vjetër e Lulëzimit i la të digjen rrugëve”. Sipas ministrit, “projekti i Tiranes është ende larg konkretizimit dhe hëpërhë nuk mund të thuhet që është e sigurt se do te zbatohet, por e sigurt është që në seancën e kësaj jave ne Kuvend, Lulzim Bashën e pres me kënaqësi në një përballje shifrash, faktesh dhe provash”.
Arbër Hitaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.