PD: Më shumë se 20 mijë familje të përjashtuara nga skema ekonomike

Më shumë se 20 mijë familje të varfra janë përjashtuar nga skema ekonomike që prej janarit të këtij viti sipas Partisë Demokratike. Deputetet e PD-së të Qarkut të Tiranës, Oriola Pampuri, Grida Duma dhe Rudina Hajdari kanë vizituar sot disa familje në zonën e Bathores, duke u shprehur se këto familje janë përjashtuar nga skema e ndihmës ekonomike në mënyrë të padrejtë.

 “Sipas informacioneve që ka Partia Demokratike, që nga janari dhe deri tani, nga skema ekonomike janë përjashtuar më shumë se 20 mijë familje.

Tiranë            janë hequr   15 000 familje

Gjirokastër   janë hequr   1 600 familje

Divjakë          janë hequr      825 familje

Kamëz           janë hequr      782 familje

Lushnjë         janë hequr      750 familje

Kavajë           janë hequr      680 familje.”

Më tej në njoftimin e PD-së thuhet se rreth 55 mijë familje që jetojnë në mjerim nuk marrin më ndihmë ekonomike që prej ardhjes së Partisë Socialiste në pushtet në vitin 2013.

Ndërkohë, deputetja Grida Duma i kërkuar Ministrisë së Shëndetësisë dhe Çështjeve Sociale të bëjnë transparencë lidhur me sistemin e ri të pikëve që ju mundëson familjeve në nevojë të përfitojnë nga ndihma ekonomike. Duke u shprehur se po e monitoron këtë çështje prej disa ditësh, PD u ka ofruar ndihmë të gjithë të përjashtuarve nga skema ekonomike.

“Ajo që do bëjmë është se përveç shkresës që i kemi dërguar Ministres së Shëndetësisë për të na treguar dhe bërë transparente kriteret mbi të cilat vlerësohet marrja ose jo e ndihmës ekonomike, është që në zyrën tonë të avokatisë në Partinë Demokratike, me zyrën ekonomike me bashkinë përkatëse të ndjekim rast pas rasti të gjitha familjet që janë përjashtuar nga ndihma ekonomike dhe të tregojnë që janë jo vetëm në meritën e tyre dhe në detyrimin e shtetit për t’i rifutur në skemë, por edhe për t’i treguar se kjo lloj skeme nuk funksionon dhe është e dështuar “, u shpreh Grida Duma.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.