PE diskuton për Shqipërinë – “Hapja e negociatave do të vlerësohet në bazë të progresit të reformave”

Parlamenti Europian ka votuar me 459 vota pro raportin e vitit 2018 të Komisionit Europian për Shqipërinë. Raporti në fjalë mbështet nisjen e negociatave për anëtarësim të vendit tonë në union vitin e ardhshëm. Përveç kërkesës së zakonshme për të vijuar me procesin e reformave, sidomos në gjyqësor, në dokumentin e aprovuar me 459 vota kërkohet nga qeveria dhe opozita shqiptare arritja dhe aprovimi i reformës zgjedhore, përpaara zgjedhjeve lokale të vitit të ardhshëm.

Por, ajo që duket më e rëndësishme është nënvizimi  i faktit se, vendimi për të hapur ose jo negociatat do të merret pasi të vlerësohet procesi i reformave të ndërmarra deri më tani. Raporti nënvizon  edhe një sërë progresesh të tjera që duhen vënë re gjatë kësaj periudhe. Votimi i Parlamentit Europian me 459 vota pro, 112 kundër si dhe 68 abstenime është përshëndetur edhe nga kreu i grupit parlamentar të Partisë Socialiste Taulant Balla.

“Negociatat për anëtarësim duhet të hapen në njohje të përpjekjeve reformuese të bëra nga Shqipëria”,-shkruan Balla. Raportuesi për Shqipërinë Knut Fleckenstein ka folur me doza mjaft optimiste për ecurinë e Shqipërisë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.