PE kundër KE për fondet IPA – Rrëzon propozimin, miraton rritje të buxhetit për 2021-2027

Parlamenti Europian ka hedhur poshtë propozimin e Komisionit Europian për të ulur fondet e programeve ndërajonale. Këto programe përfshinë edhe Shqipërinë, me programin ndërajonal IPA II mes rajonit të Puglias në Itali, Malit të Zi dhe vendit tonë.

Komisioni Europian kishte kërkuar kështu një fond bindshëm më të ulët, ndërkohë që Komisioni për Zhvillimin Rajonal brenda Parlamentit Europian miratoi me unanimitet një buxhet në 11.16 miliardë euro, ose 2.73 miliardë euro më shumë se kërkesa e krahut ekzekutiv të Bashkimit Europian.

Për të arritur në këtë votim, kanë lobuar gjerësisht europarlamentarët italianë. Komisioni Europian nuk kishte kërkuar vetëm një ulje të buxhetit por edhe një kufizim të ndjeshëm të këtyre pogromeve për periudhën 2021-2027. Parlamenti Europian duket i bindur për të mbajtur programet ndërkufitare të bazuara mbi kufijtë detarë.

Këto pograme janë vetëm për zonat detare, dhe për këtë arsye Shqipëria është përfituese kryesore e fondeve në fjalë. Programi aktual ndërrajonal IPA II mes Shqipërisë, Italisë dhe Malit të Zi ka nisur në vitin 2014 dhe do të mbarojë në vitin 2020.

Me bekimin e Parlamentit Europian ky program do të vazhdojë, edhe me më shumë fonde. Programi aktual ka një fond prej 92 milionë eurosh dhe ka për qëllim të nxisë rritjen ekonomike dhe zhvillimin në këtë zonë të Mesdheut.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.