Pekini me “as” nën mëngë – Kërcënon SHBA me tarifa mbi importet e naftës
Pekini zyrtar ka menduar një lëvizje të papritur që mund të ndikojë jo vetëm ekonominë amerikane por edhe tregun e arit të zi. Si kundërpërgjigje ndaj tarifave të vendosura ndaj importeve kineze në Shtetet e Bashkuara, Pekini po mendon që të vendosë tarifa ndaj naftës së importuar nga Shtetet e Bashkuara të Amerikës. Kina është konsumatori më i madh i naftës në botë dhe vendi i dytë më i madh importues i arit të zi.
Një lëvizje e tillë do të kishte një impakt të padiskutueshëm në treg. Kina është importuesi më i madh i naftës amerikane. Kjo do të ishte një lëvizje shtesë, krahas asaj ndaj disa produkteve të tjera amerikane. Ekspertët e tregut e vlerësojnë si të papritur një lëvizje të tillë, e cila do të tensiononte tej mase luftën tregtare, që tashmë ka nisur mes dy ekonomive më të mëdha të botës.
Tarifat mbi naftës bruto amerikane do të shtynin rafineritë kineze të mos blinin më naftë amerikane, duke i`u drejtuar vendeve të tjera, kryesisht OPEC dhe Rusisë, çka do të sillte edhe një rimodelim të tregut global të arit të zi. Kjo vjen ne një kohë që si OPEC ashtu edhe Rusia pritet të rrisin prodhimin e naftës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.