Pekini, në “emergjencë lufte” – Valë e re infeksionesh në një treg shumice, izolim dhe pezullim i turizmit

Kina i trembet një vale të dytë infektimesh nga Sars-Cov-2, kësaj radhe në Pekin. Zyrtarët kinez kanë raportuar se për të dytën ditë me radhë janë konfirmuar raste pozitive me Covid-19 që lidhen me një treg shumice të produkteve agro-bujqësore në kryeqytetin kinez. Kjo ka detyruar autoritetet që të mbyllin përkohësisht tregun.

Madje edhe në mjedis kanë rezultuar grimca të virusit, thonë mediat  kineze. Për siguri është mbyllur edhe një treg tjetër pranë tij, ku mësohet se pacientët e rinj kishin pasur kontakte. Kryeqyteti kinez ka pezulluar përkohësisht edhe turizmin që prej së shtunës, ndërkohë që rajoni i Pekinit ku ndodhet edhe tregu me shumicë është në emergjencë lufte. Nga 517 teste që janë bërë në tregiun e shumicës, 45 prej tyre kanë rezultuar pozitive, çka ka rritur ndjeshëm frikën e autoriteteve vendase.

Njëmbëdhjetë lagje afër tregut janë futur në karantinë gjithashtu. Autoritetet deklaruan gjithashtu se, janë tërhequr nga plani për rihapjen e shkollave për klasat e para, të dyta dhe të treta, si pasojë e rasteve të reja.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.