Peleshi: Eksportet bujqësore drejt BE janë rritur me 26% gjatë tremujorit të parë

Gjatë tre muajve të parë të vitit eksportet drejt vendeve të Bashkimit Europian janë rritur ne 26 për qind. Por për të mbrojtur imazhin e bujqësisë shqiptare, fermerët duhet të vazhdojnë të rritin cilësinë dhe sigurinë ushqimore.

“Nga ana tjetër të rrisin ndërgjegjësimin dhe format e reja të bujqësisë shqiptare. Të rritim cilësinë, të rritim sigurinë ushqimore, por dhe ta mbrojmë imazhin e bujqësisë shqiptare, sepse nuk është ashtu siç reklamohet. Nuk janë prodhimet tona “delja e zezë” e prodhimeve të tregut evropian. E kundërta është e vërtetë. Vetëm vitin e kaluar eksportet tona drejt tregjeve të Bashkimit Evropian, janë rritur me 26 %”, deklaroi Peleshi.

Këto deklarata ministri i Bujqësisë dhe Zhvillimit Rural Niko Peleshi i bëri gjatë vizitës në qarkun e Durrësit, ku është ndalur në një fermë që operon nën konceptin “contract farming”. Sipas këtij modeli fermerët, grumbulluesi dhe eksportuesi në marrëveshje mes tyre kanë të garantuar shitjen e produkteve që në momentin e mbjelljes.

“Ky lloj modeli orienton mbjelljet sipas nevojave të tregut. Në rastin konkret dhjetëra fermerë të zonës së Shënvlashit janë duke eksportuar shalqirin në Suedi, në Estoni, në Itali, në Poloni, në Zvicër, në Hungari etj. Ky është modeli i fermës shqiptare, që ne duam ta përhapim në gjithë Shqipërinë, kur flasim për kooperim”.

E.Z/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.