Peleshi njofton ndërtimin e një baze ajrore në Kuçovë – Investimi mbi 50 milion euro

Në fjalimin e tij Ministri i Mbrojtjes Niko Peleshi ka njoftuar vendimin e ri për ndërtimin e bazës ajrore në Kuçovë.

“Sapo miratuam një vendim i cili ishte propozim i Ministrisë së Mbrojtjes dhe që lidhet me projektin më madhor në fushën e zhvillimit të infrastrukturës së forcave të armatosura, bëhet fjalë për bazën ajrore të Kuçovës e cila me vendimin e sotëm kompleton kuadrin rregullator, ligjor dhe i hap rrugën fillimit të punimeve”, u shpreh Peleshi.

“Në ditët e para të janarit ne do të vendosim në mënyrë simbolike gurin e parë të bazës taktike të Kuçovës, një bazë taktike e NATO-s, një lajm shumë i mirë edhe për familjet që preken për sot nga vendimi i shpronësimit, sepse së pari dua që t’ju siguroj që do të shpronësohen sipas vlerës së plotë të tregut bazuar në gjithë aktet ligjore dhe pa asnjë vonesë”, tha ministri

“Nga ana tjetër për banorët e zonës përreth është një lajm i dyfishtë pozitiv sepse ky është një zhvillim i disa dhjetëra miliona euro, është një investim i mbi 50 milion euro që do të thotë zhvillim ekonomik dhe punësim për gjithë zonën përreth” shtoi ai.

“Ky është një lajm i mirë për gjithë rajonin, për sigurinë kombëtare dhe për sigurinë e rajonit të Ballkanit perëndimor sepse do të kemi një bazë taktike ajrore të NATO-s çka do të thotë më shumë siguri, për sot dhe për nesër”, përfundoi Peleshi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.