Pengesat për vetëprodhimin e energjisë – S’ka tarifë për shitjen, Çekrezi: Netimi të bëhet vjetor. Simaku: Po ndryshojmë ligjin

Mungesa e një tarife, për shitjen e energjisë së vetëprodhuar nga panelete fotovoltaike po kufizon shfrytëzimin e këtyre impinateve nga ana e bizneseve në masën 100%. Çmimi duhet të përcaktohet nga Enti Rregullator i Energjisë, ndërkohë që nënkryetari i Dhomës së Tregtisë dhe Industrisë, Tiranë Elton Çekrezi, i cili është njëkohësisht edhe administrator i një kompanie, që operon në fushën e paneleve fotovoltaike thotë se aktualisht, reduktimi i konsumit të energjisë mund të arrihet deri në masën 60%.

Çekrezi thotë se iu është kërkuar autoriteteve që në mungesë të tarifës, përllogaritja të bëhet në baza vjetore, sikurse është praktika botërore dhe rekomandimet e Komunitetit të Energjisë.

Zv. ministri i Infrastrukturës dhe Energjisë, Gjergji Simaku thotë se po punohet në këtë drejtim, duke parashikuar ndryshime ligjore, që do të mundësojnë netimin vjetor, të kërkuar edhe nga grupet e interesit.

Simaku nuk jep afate konkrete, por thotë se ndryshimet do të hyjnë në fuqi shumë shpejt.

Sipas udhëzimit të miratuar në vitin 2019, një shoqëri e vogël ose e mesme, apo një klient familjar mund të instalojë një kapacitet total më të vogël 500 kwp për vetëprodhimin e energjisë elektrike nga dielli, duke lejuar lidhjen e këtyre impianteve me rrjetin e shpërndarjes, teksa aktualisht çdo muaj bëhet bilanci midis energjisë së prodhuar dha asaj të shpenzuar.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.