Penka, lopa që u arratis nga Bashkimi Europian, i shpëton thertores

Një lopë bullgare e quajtur Penka, e cila ishte vendosur të therrej pas kalimit aksidental drejt Serbisë, do të kthehet e sigurt në vendin e saj të origjinës. Njoftimi vjen nga autoritetet veterinare bullgare pas testimeve të suksesshme shëndetësore të lopës.

“Testimet laboratorike rezultuan negative për të gjitha sëmundjen e testuara. Lopa nuk do të therret dhe do t’i bashkohet tufës së saj brenda fundit të javës”, njoftoi Agjencia Bullgare për Sigurinë Ushqimore ditën e hënë.

Penka ishte larguar më 12 Maj nga tufa e saj, teksa kulloste pranë fshatit bullgar Kopilovtsi. Lopa e humbur kishte arritur deri në Serbi, kur një fermer serb e kishte identifikuar nga numri i saj i matrikullës dhe e kishte kthyer pas dy javësh tek pronari i saj, Ivan Haralampiev.

Por këtu nisën edhe problemet për Penkan. Rregullat europiane përcaktojnë qartë se kur importohen kafshë të gjalla, është e nevojshme që lopa të ketë një certifikatë veterinare që vërteton shëndetin e saj, përpara se të kthehet në BE. Në mungesë të këtij dokumenti, autoritetet bullgare kishin kërkuar që të vritej.

Pronari i saj lëshoi një apel publik për ta shpëtuar dhe historia e Penkas u vë në qendër të mediave dhe rrjeteve sociale europiane.

Mbi 25 mijë njerëz nënshkruan një peticion online për të shpëtuar Penkan, ndërsa ish anëtari i Beatles, Paul McCartney kërkoi në rrjetet sociale që lopa të shpëtohej, duke përdorur edhe hashtagun #SavePenka. Çështja madje u diskutua gjatë edhe gjatë një mbledhjeje të Komisionit Europian.

Ndërkohë, gjatë kësaj periudhe lopa qëndroi në karantinë, larg presionit të mediave. Pronari i saj falënderoi të hënën të gjithë ata që e ndihmuan të shpëtonte lopën e tij. Fermeri modest ka ndërmend ta shpërblejë lopën e veçantë me ushqim luksoz dhe shumë përqafime.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.