Pension familjeve, rasti Rasha bëhet precedent – Ndërhyhet në ligj, trajtim të posaçëm financiar për çdo viktimë të forcave të rendit

Në të ardhmen, familja e çdo personi që humb jetën për shkak të veprimeve të punonjësve të agjencive ligj zbatuese në vend do përfitojë pension të posaçëm. Marrë shkas nga ngjarja e rëndë e ndodhur pak ditë më parë, ku i riu Klodian Rasha gjeti vdekjen nga të shtënat e një efektivi të forcave të ndërhyrjes së shpejtë, Komisioni Parlamentar i Punës dhe Çështjeve Sociale ka miratuar një ndryshim në Ligjin për Sigurimet Shoqërore  duke shtuar një dispozitë me efekt të menjëhershëm që parashikon trajtimin e veçantë financiar për familjen e personit që ka humbur jetën aksidentalisht nga veprimet e punonjësve të agjencive ligjzbatuese në vend. Argumentimi i Projektaktit para deputetëve është bërë nga Dajna Sorensen zëvendësministre e Financave.

Duke ju referuar polemikave të fundit mbi klasifikimin e ngjarjes që shkaktoi vdekjes së 25 vjeçarit, Relatorja e Projektaktit Klodjana Spahiu sqaroi se termi “aksidental” është një term i përdorur gjerësisht në ligjin nr.52/2014, “Për veprimtarinë e sigurimit dhe risigurimit” si dhe nga kompanitë e sigurimit të jetës që operojnë në Republikën e Shqipërisë.

Klodjan Rasha, në orët e mëngjesit të 8 dhjetorit, është qëlluar nga një distancë e afërt nga punonjësi i policisë, Nevaldo Hajdaraj, i cili tashmë është nën akuzë për vrasje me dashje.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.