Pensionet e harruara të Shqipërisë – Gjatë periudhës 2012-2017 kemi vetëm indeksim, jo rritje

Sytë nga mosha e tretë duket se kthehen çdo një tetor, ku vizitohen institucionet e  rezidencës e bëhen një sërë premtimesh për përmirësimin e jetesës.  Për shumë vite më radhë në Shqipëri nuk është bërë asnjë rritje domethënëse e pensionit, për tju siguruar një jetesë dinjitoze të moshuarve.  Por a e dini se sa është masa e pensionit mesatar në Shqipëri?!

Aktualisht  në vendin tonë mbi 24 për qind e shoqërisë përfitojnë një pension. Nga viti në vit pensionet në Shqipëri indeksohen në bazë të inflacionit dhe  nuk kemi një rritje reale të tyre. Në bazë të përpunimit të të dhënave masa e pensionit mesatar në Shqipëri  ka ndryshuar  me hapin e breshkës.  Po marrim në shqyrtim tre llojet e pensioneve , të pleqërisë, pensionin familjar dhe atë të invaliditetit. Referuar pensionit të pleqërisë  i ndarë në qytet dhe në fshat që nga viti 2012 në 2017 nuk ka patur rritje domethënëse.

Pensionet mesatare të pleqërisë  në qytet në vitin 2012 ishin në vlerën e 13,324 lekë, ndërsa në vitin 2017 shkuan në vlerën e 15,527 lekë. Pensionet e pleqërisë në fshat janë më të ulëta dhe në vitin 2012 vlera e tyre mesatare ishte 7,457 lekë ndërsa në vitin 2017 pensioni mesatar i pleqërisë në fshat shkoi në 8,808 lekë. Nga përpunimi i të dhënave rezulton se pensioni familjar për pensionistët e fshatit dy vitet e fundit është uluar ndjeshëm. Kështu nga viti 2012 një pension familje në fshat ishte mesatarisht 3,002 lekë ndërkohë që në vitin 2017 ky pension është 2,477 lekë.

Ndërsa referuar vlerës mesatare të këtij pensioni në qytet në vitin 2012 ishte 6536 lekë dhe në vitin 2017 vlera mesatare e tij ishte 6706 lekë.  Një diferencë e thellë e vlerës mesatare të pensioneve vihet re edhe nëse krahasojmë  pensionet e qytetit me të fshatit sa i përket pensionit të invaliditetit. Një person që ka statusin e invalidit në qytet në vitin 2012 merrte një pension mesatar prej 11,738 lekë ndërsa në vitin 2017 vlera mesatare e këtij pensioni shkoi në 13389 lekë.

Referuar pensionit të invaliditetit në fshat vlera mesatare e tij në vitin 2012 ishte 5738 lekë ndërsa në vitin 2017 pati një rritje të vogël në 6452 lekë. Masa e pensionit mesatar në Shqipëri është shume herë më e vogël krahasuar me vend e rajonit. Ndërkohë  një pensionisti shqiptar nuk i mjaftojnë paratë për të mbyllur muajin me shpenzime minimaliste edhe pse ka punuar një jetë  të tërë.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.