Pensionet familjare, në kufijtë e mjerimit – U ulën në vitin 2018, në fshat përfitimi është sa 1/10 e pagës minimale
Edhe pse çdo vit Këshilli i Ministrave nxjerr vendime për indeksimin e pensioneve, me qëllim rritjen e tyre në masën e rritjes së inflacionit, vlera e pensionit është e ulët, sidomos për pensionet rurale.
Në një raport auditimi të publikuar së fundmi, Kontrolli i Lartë i Shtetit vë në dukje se ajo që vihet re është se në vitin 2018 një person që merr pension familjar rural, përfiton vetëm 2.312 lekë në muaj, që janë më pak sesa 1/10 e pagës minimale në shkallë vendi, si dhe vlera e këtij lloji pensioni ka ardhur në ulje nga viti në vit. Po ta krahasojmë me vitin 2015, ku regjistrohej në 3240 lekë, ka pësuar rënie drastike, çka e bën atë të jetë një mbështetje financiare në kufijtë e mjerimit për familjet në nevojë.
Po ashtu, edhe pensionet e pleqërisë në fshat kanë pësuar rënie krahsimisht me vitin 2017, ndërsa janë rritur lehtësisht pensionet e invaliditetit. Ndërsa trend rritës gradual kanë njohur pensionet urbane, megjithatë duhet theksuar se pensionet familjare mbeten në nivele shumë të ulëta, rreth 6900 lekë.
Sipas KLSH, vlera e ulët e pensioneve apo mos lidhja e tyre për shkak të mosnjohjes së viteve të punës është një nga problematikat aktuale më të mëdha, që po rend pensionistët nëpër gjykata. Numri i kërkesave për rishqyrtime dhe i ankesave është shumë i lartë, çka tregon pakënaqësinë e qytetarëve.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.