Pensionet private – AMF licencon fondin e katërt
Autoriteti i Mbikëqyrjes Financiare licencoi zyrtarisht të premten fondin e katërt të pensioneve private në Shqipëri, Albsig Pension, së bashku me shoqërinë përkatëse administruese, Albsig Invest.
Së shpejti, pritet që Albsig Invest të licencohet edhe për ngritjen e një fondi investimesh. Licencimi i subjekteve të reja dëshmon interesin në rritje për zgjerimin e tregjeve financiare në Shqipëri.
Tregu i pensioneve private aktualisht numëron tre fonde të licencuara, Credins Pension, Raiffeisen Pension dhe Sigal Pension.
Ndonëse volumi i tregut është ende modest, me rreth 23 milionë euro asete, numri i kontribuesve ka arritur tashmë në më shumë se 27 mijë.
Ndërkohë, tregu i fondeve të investimit ka përmasa më të mëdha, me asete neto në vlerën e rreth 540 milionë eurove dhe mbi 29 mijë anëtarë. Në këtë treg veprojnë aktualisht pesë fonde dhe tre shoqëri administruese.
Shtimi i institucioneve financiare të lidhura me tregun e kapitalit është një premisë e rëndësishme edhe për zhvillimin e bursës.
Aktualisht, fondet e pensioneve dhe sipërmarrjet e investimeve kolektive i investojnë fondet pothuajse tërësisht në bono dhe obligacione shtetërore.
Bursa pritet t’i hapë rrugë tregtimit të aksioneve dhe obligacioneve të kompanive private, që do të jenë alternativa të reja për të diversifikuar portofolin e fondeve të investimeve dhe atyre të pensioneve, por mbi të gjitha për të siguruar kthime më të larta për investitorët në këto fonde.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.