Pensionet private “mundin” pandeminë! 9-mujori: Rritje me 18.5%, “Credins Pension” numrin më të lartë të anëtarëve
Pavarësisht pandemisë COVID-19, tregu i pensioneve private vullnetare ka vijuar trendin rritës në 9 mujor, duke mos i ndjerë efektet negative. Referuar të dhënave të Autoritetit të Mbikëqyrjes Financiare, asetet neto të fondeve të pensioneve arritën në rreth 3.4 miliardë lekë apo 27,7 milionë euro, me një rritje prej 18.5% krahasuar me fundin e vitit 2019.
Po ashtu, rritje ka regjistruar edhe numri i anëtarëve në fondet e pensioneve, ku sipas shifrave të AMF-së, rezultoi 30,718 anëtarë në fund të Shtatorit 2020, apo rreth prej 8.65% më shumë krahasuar me fundin e vitit që lamë pas.
Nga katër fondet e pensioneve që funksionojnë në vend, “Credins Pensions” vijon të mbetet fondi më i madh sipas numrit të anëtarëve. Në fund të Shtatorit, Credins Pension rezulton me mbi 17 543 anëtarë, duke mbuluar kështu 57.11% të tregut.
Ndërsa, sipas vlerës së aseteve tregut, edhe pse me një numër anëtarësh prej 8313, dominon “Sigal Pensions”, me rreth 44.3 %, e ndjekur nga Credins Pensions me afërsisht 30.3% të tregut, në vendin e tretë renditet Raiffeisen Pensions me 24.5 për qind dhe në fund Albsig me vetëm 0.9 për qind.
Elisabeta Dosku/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.