Për festa, në Shqipëri Babagjyshi do të vijë nga Gjermania me kamiona
Me rastin e festave të fundvitit, organizatat e ndihmave organizohen për të kërkuar nga vullnetarët kontributin e tyre për njerëzit më në nevojë. Kështu po ndodh edhe me një organizatë gjermane të quajtur “Johanniter”, e cila ka nisur një aksion për të ndihmuar familjet në vështirësi, fëmijët, të moshuarit dhe njerëzit me aftësi të kufizuara në Europën juglindore.
Mes këtyre vendeve përfshihet Shqipëria, Bosnje Hercegovina dhe Rumania.
“Shumë njerëz në Europën juglindore kanë nevoja të mëdha dhe janë të uritur, sidomos gjatë muajve të dimrit. Shpesh atyre u mungojnë gjërat bazike. Për shumë, pakot janë një mjet i vërtetë mbijetese dhe ndihmeve”, shprehet një nga përfaqësueset e organizatës.
Organizata po u kërkon individëve, kompanive, shkollave, çerdheve e shoqatave të ndryshme të dhurojnë ushqime dhe produkte higjiene.
Pakoja e këshilluar përfshin sendet e mëposhtme: 1 dhuratë për fëmijë (libra për të ngjyrosur, bojëra), 3 kg sheqer, 3 kg miell, 1 kg oriz, 1 kg makarona, 1 litër vaji gatimi, 3 pako me tableta me multivitamina, 3 pako me biskota, 5 çokollata, 500 g pluhur pije kakao, 2 shampo, 1 krem për duart, 2 pasta dhëmbësh dhe 2 furça dhëmbësh.
Pakot do të mblidhen në rajone të ndryshme të Gjermanisë deri më 15 Dhjetor, ndërsa shpërndarja do të nisë ditën e dytë të Krishtlindjeve. Rreth 100 shoferë kamionësh vullnetarë do të nisin rrugëtimin e tyre disa ditor. Pakot do të shpërndahen në disa pika grumbullimi për të qenë sa më pranë përfituesve.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.