Për të gjithë ata që nuk tërheqin dot pensionet në bankë, Ministria e Financave bën shpjegimin: “Ja si duhet të veproni”
Ministria e Financave dhe Ekonomisë ka bërë me dije se po bashkëpunon me Shoqatën e Bankave për të bërë të mundur për të gjithë pensionistët që nuk tërheqin dot lekët nga llogaria e tyre, kjo pagesë t’i vijë menjëherë në shtëpi.
Ky shërbim do të kryhet nga strukturat e bankave dhe pa kosto shtesë për pensionistët. Më tej Ministria ka inkurajaur të gjithë pensionistët që kanë marrë lekët në llogarinë e tyre të kontaktojnë me Bankat përgjegjëse dhe ata do bëjnë transfertën në shtëpi. Nëse problemi mbetet i pazgjidhur, njerëzit mund t’i drejtohen portalit shqipëriaqëduam.al, shkruhet më tej në njoftim:
Njoftimi i plotë:
Në vijim të zbatimit të masave të ndërmarra nga Qeveria për situatën e krijuar nga Covid -19, ju bëjmë me dije se, strukturat e Ministrisë së Financave dhe Ekonomisë po bashkëpunojnë me Shoqatën e Bankave për shpërndarjen e pensioneve për ata që nuk mund ta tërheqin dot në bankë.
Lidhur me shqetësimin e krijuar ditët e fundit për pamundësinë e daljes së pensionistëve për të tërhequr pensionin pranë këtyre bankave, MFE është dakortësuar me Shoqatën e Bankave, që këto të fundit të gjejnë mundësinë për t’jua dërguar në shtëpi pensionin atyre që nuk shkojnë dot në bankë.
Shërbimi do të kryhet nga strukturat e bankave dhe pa kosto shtesë për pensionistët.
Janë të lutur të gjithë ata pensionistë që nuk kanë mundur të tërheqin pranë bankës pensionin e tyre të komunikojne direkt me bankat, të cilat do të ndërmarrin menjëherë masat përkatëse për dërgimin e tyre pranë banesës.
Është thelbësore të theksojmë për të gjithë pensionistët që me durim të presin zgjidhjen e kësaj situate.
Gjatë këtyre ditëve ka vijuar normalisht shpërndarja e pensioneve nëpërmjet Postës Shqiptare.
Ritheksojmë se çdo institucion qendror apo lokal është në dispozicion dhe shërbim të këtij komuniteti për çdo lloj nevoje.
Në çdo rast vonese ju lutemi të shkruani në portalin Shqipëria që duam,
https://www.shqiperiaqeduam.al/ dhe ne do të ndjekim rastin tuaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.