Përballë varianteve të reja, BE porosit edhe 4 milion doza shtesë vaksinash nga Pfizer-BioNTech

BE ka siguruar një marrëveshje me Pfizer-BioNTech për një shtesë prej 4 milion dozash vaksine COVID-19 për të përmbajtur një përhapje të varianteve të reja të koronavirusit.

Komisioni Europian tha të mërkurën se marrëveshja do të ndihmojë “trajtimin e pikave të nxehta të koronavirusit” dhe lehtësimin e lëvizjes së lirë të kufirit. Dozat shtesë, që do të shpërndahen në dy javët e ardhshme, vijnë përveç dërgesave të planifikuara më parë të vaksinave.

“Kjo do të ndihmojë vendet anëtare në përpjekjet e tyre për të mbajtur nën kontroll përhapjen e varianteve të reja,” tha Presidentja e Komisionit Europian Ursula von der Leyen. “Përmes përdorimit të tyre të synuar atje ku janë më të nevojshme, veçanërisht në rajonet kufitare, këto doza do të ndihmojnë në sigurimin ose rivendosjen e lëvizjes së lirë të mallrave dhe njerëzve. Këto janë kryesore për funksionimin e sistemeve shëndetësore dhe tregun e vetëm “.

Pavarësisht nga një ngadalësim i infeksioneve të reja në të gjithë bllokun, Komisioni tha se është i shqetësuar nga situata epidemiologjike në disa zona, kryesisht për shkak të përhapjes së varianteve të reja. Ai përmendi Tirolin në Austri, Nice dhe Moselle në Francë, Bolzano në Itali dhe disa pjesë të Bavarisë dhe Saksonisë në Gjermani si vendet ku shtrimet në spital të COVID-19 kanë qenë në rritje. (EN)

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.