Përballimi i fluksit në spitale, Manastirliu: Bluzat e bardha në gadishmëri për festat

Shërbimi shëndetësor do të ofrohet pa ndërprerje edhe gjatë ditëve të festive të fundvitit.

Ministria e Shëndetësisë dhe e Mbrojtjes Sociale po merr masat që të qytetarët të kenë akses në sistemin shëndetësor pavarësisht festive. Këtë fakt e ka bërë të ditur Ministrja e Shëndetësisë Ogerta Manastirliu gjatë një aktiviteti për fëmijët e pediatrisë ku u shpërndanë edhe 120 dhurata.

“Dua që të garantoj të gjithë qytetarët që gjatë gjithë kësaj periudhe festive janë marrë të gjitha masat në lidhje me rastet e urgjencës që mund të ndodhin përsa i përket shërbimit 24 orë në 24 nëpër spitale, janë marrë masat, për të mos munguar medikamentet dhe çfarë është më e rëndësishmja, ekipi i mjekëve dhe infermierëve është në gjendje gatishmërie për festat e fundvitit”, tha Ministrja e Shëndetësisë dhe Mbrojtjes Sociale.

Me iniciativën e Ministrisë së Shëndetësisë dhe Mbrojtjes Sociale dhe Cirkut të Tiranës, atmosfera festive përfshiu sot të gjitha pavijonet e Pediatrisë së Qendrës Spitalore Universitare “Nënë Tereza”, ku akrobatët e Cirkut të Tiranës dhanë shfaqje për fëmijët e sëmurë.

Shefja e Shërbimit të Onko-Hematologjisë, prof. Anila Godo shprehu kënaqësinë që në këtë pavijon, ku ka kaq shumë nevojë, erdhën ngjyrat, festa, argëtimi për fëmijët me sëmundje të rënda.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.