Përdorimi i automjeteve elektrike – MIE: Duhet të përbëjnë 10% të flotës totale, detyrime për certifikimin e operatorëve
10% e të gjithë flotës së automjeteve në vendin tonë duhet të jenë elektrike. Ky është një prej rezultateve që duhet të arrihet në kuadër të dekarbonizimit deri në vititn 2030, sipas Draft Planit Kombëtar për Energjinë dhe Klimën, i nxjerrë për konsultim publik nga Ministria e Infrastrukturës dhe Energjisë. Dokumenti përcakton edhe një sërë masash për arritjen e këtij rezultati, duke përfshirë caktimin e objektivëve ligjorë ndaj operatorëve ekonomikë dhe zbatimin e tyre, si dhe certifikimin i cili garanton pajtueshmërinë e operatorëve ekonomikë me kërkesat e qëndrueshmërisë.
Gjithashtu, do të bëhet përcaktim i detyrimeve të subjekteve të caktuara, siç janë parkimet publike ose garazhet publike, për të qenë të pajisur me stacione për karikimin e automjeteve elektrike. Paralelisht përcaktohen edhe incentiva për të arritur këtë rezultat, duke përfshirë strategji dhe mekanizma mbështetës për energjinë elektrike në transport; incentiva ose procedura të thjeshtuara për ndërtimin apo licencimin e stacioneve të karikimit me energji elektrike për automjetet rrugore, përjashtim i plotë nga TVSH për automjetet e reja me motor elektrik me zero km, të paregjistruara më parë në asnjë vend tjetër, etj. Arritja e objektivit që 10% e automjeteve të jenë elektrike duket se do të jetë një sfidë e madhe, nëse mbajmë parasysh se aktualisht shifrat janë tejet të ulta.
Të dhënat e fundit të disponueshme nga Drejtoria e Përgjithshme e Shërbimeve të Transportit Rrugor tregojnë se aktualisht në vendin tonë janë të regjistruara 1 160 makina elektrike, ndërkohë që në raport me numrin e përgjithshëm të automjeteve që qarkullojnë vetëm në Tiranë, ato përbëjnë 0.058% të totalit. Aktualisht, DPSHTRR rimburson çdo tarifë të regjistrimit për herë të parë për mjetet elektrike. Bëhet fjalë për tarifat që paguhen për kontrollin fizik, lejen e qarkullimit, targat standarde dhe certifikatën e pronësisë, me një vlerë totale prej 7 500 lekësh.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.