Përdorimi i bonove të privatizimit, nisma do të diskutohet në Komisionin e Ekonomisë
Ndryshimet e bëra nga Ministria e Financave në projektligjin për emetimin dhe shpërndarjen e bonove të privatizimit tashmë do të kalojnë në sitën e komisioneve parlamentare. Nisma e dorëzuar në Kuvendin e Shqipërisë në janar të këtij viti do të shqyrtohet të hënën në Komisionin e Ekonomisë dhe Financave.
Afati i përdorimit të bonove dhe lekëve të privatizimit ishte deri në fund të vitit të kaluar, por me projektaktin e qeverisë është shtyrë deri në fund të 2017-ës. Ndryshimi që i bëhet ligjit për “Për emetimin dhe shpërndarjen e bonove të privatizimit” thuhet se do të krijojnë lehtësira ndaj ish-pronarëve të truallit në procesin e privatizimit të pronës shtetërore, të cilët gëzojnë të drejtën e parablerjes në këtë proces, si dhe në procesin e legalizimit të ndërtimeve informale nëpërmjet ALUIZNI-t.
Qeveria argumenton se meqenëse në procesin e privatizimit të pronës shtetërore vazhdon të mos jenë përfshirë akoma një numër i konsiderueshëm objektesh – kryesisht në administrim të Ministrisë së Mbrojtjes, Ministrisë së Brendshme, Ministrisë së Bujqësisë, Zhvillimit Rural dhe Administrimit të Ujërave apo dhe të organeve të pushtetit vendor, si dhe duke gjykuar se shumë prej këtyre objekteve shtrihen në pronat e ish- pronarëve të njohur apo kthyer me vendime të kthimit dhe kompensimit të pronave, për ish-pronarët thuhet se duhet të vijojnë lehtësirat, duke e likuiduar një pjesë të vlerës së këtyre objekteve në rast parablerje me bono privatizimi.
“Llogaritja e aksioneve për punonjësit në shoqëritë aksionare ku punonjësit e këtyre shoqërive përfitojnë aksione në këmbim të bonove të privatizimit e bën të domosdoshëm shtyrjen e afatit të përdorimit të bonove të privatizimit”, thuhet në relacionin përkatës të projektligjit.
Përdorimi i bonove të privatizimit dhe lekëve të privatizimit në procesin e legalizimit të ndërtimeve pa leje nëpërmjet ALUIZNI-t, ndërkohë që ky proces është në vazhdimësi dhe vijojnë të jenë në proces legalizimi një numër i konsiderueshëm objektesh apo banesash, gjykohet nga qeveria se edhe ky proces e bën të domosdoshëm shtyrjen e afatit të përdorimit të bonove të privatizimit dhe lekëve të privatizimit.
Sipas të dhënave zyrtare të Ministrisë së Financave, në total janë emetuar 74.9 miliardë lekë bono privatizimi, prej të cilave u janë shpërndarë publikut 51.2 miliardë lekë.
Nga këto janë përdorur deri tani në proces privatizimi 10 miliardë lekë, ndërkohë që mbeten të shpërndara dhe të papërdorura 41 miliardë lekë të tjera. ish- pronarët e truallit që gëzojnë të drejtën e parablerjes mund të kryejnë pagesën për objektin apo ndërmarrjen që privatizohet në një raport 20 % me lekë dhe 80 % me bono dhe lekë privatizimi.
Florenc Drizari/RTVSCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.