Përdorimi i celularit – 171 minuta thirrje, 1.65 GB internet në muaj
Shqiptarët flasin mesatarisht 171 minuta në muaj me telefonin e tyre celular.
Sipas të dhënave nga Autoriteti i Komunikimeve Elektronike dhe Postare, në tremujorin e fundit të vitit të kaluar përdorimi mesatar i telefonit celular për thirrje u rrit me 8.3% krahasuar me të njëjtën periudhë të një viti më parë.
Tashmë, thirrjet brenda rrjetit përbëjnë më pak se 57% të totalit, nga 68% që zinin në tremujorin e fundit të vitit 2015.
Njehsimi i tarifave brenda rrjetit me ato jashtë rrjetit po jep efekte të qarta, duke e bërë komunikimin më të lirshëm.
Kjo po pasqyrohet edhe në numrin total të përdoruesve aktivë, apo më saktë të numrave celularë aktivë në përdorim. Për tremujorin e tretë, numri i përdoruesve aktivë ra në 3.3 milionë, 2.4% më pak krahasuar me të njëjtën periudhë të një viti më parë.
Kjo tregon se numri i përdoruesve që mbajnë më shumë se një numër celular është rënie. Përdorimi i mesazheve të shkruara ka arritur një lloj ngopjeje dhe prej disa tremujorësh qëndron mesatarisht pranë nivelit 40 në muaj.
Për shkak të mënyrave alternative të komunikimit, të mbështetura te interneti, si WhatsApp apo Viber, konsumatorët e kanë zëvendësuar mesazhet e dërguara direkt nga rrjetet.
Rritja e vërtetë në shërbimet e lëvizshme po vjen pikërisht nga interneti me brez të gjerë, që numëron afro 1.7 milionë përdorues.
Për herë të parë AKEP ka publikuar edhe vëllimin e trafikut të të dhënave të përdorur nga rrjetet celulare.
Statistikat tregojnë se një përdorues konsumon mesatarisht 1.65 GB trafik interneti çdo muaj.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.