Përdorimi i gazit natyror të lëngshëm – Albgaz hap tenderin 137.7 milion lekë, studim për terminal dhe përdorim nga konsumatorët
Kompania shtetërore e gazit, Albgaz do të përgatisë studimin kombëtar të fizibilitetit për zhvillimin e gazit natyror të lëngshëm, duke patur një vlerësim qëndrueshmërie mbi krijimin e një terminali për importin, si dhe potencialin për të vendosur shpërndarjen e tij në shkallë të vogël tek industritë kryesore në vend, transportin detar, hekurudhor, rrugor, klientët e tjerë fundorë tregtar dhe rezidencial, në të gjithë Shqipërinë dhe potencialisht në rajonin përreth. Përmes një tenderi me vlerë 137.7 mln lekë, ky dikaster kërkon kontraktimin e një konsulenti, që do të duhet të analizojë shpërndarjen e LNG-së në shkallë të vogël nga qendra e depozitimit e sugjeruar, në zonat afër tij.
Kjo analizë duhet të përfshijë lëvizjen e LNG-së në zonat e zhvilluara industriale dhe qytetet e tjerë brenda një distance të realizueshme ekonomikisht nga vendi i depozitimit, si dhe tek klientë të tjerë të qëndrueshëm. Klientët do te duhet të të identifikohen dhe analizohen, ndërkohë që i gjithë studimit do të duhet t’i dorëzohet Albgaz, 3 muaj nga nënshkrimi i kontratës. Ndërkaq, paralelisht, konsulenti do të duhet të përgatisë edhe strategjinë dhe Planin e Biznesit të kompanisë 2021 ¬2025, si dhe planin 10-vjeçar të Investimeve.
Kompanitë e interesuara kanë afat deri në datën 7 shtator për të dorëzuar ofertat e tyre, ndërkohë që nëse e gjithë procedura nuk pasohet me ankesa nga operatorët ekonomiksë pjesëmarrës në garë, në fillim të vitit që vjen studimi duhet të jetë gati. Aktualisht, Shqipëria nuk ka prodhim të konsiderueshëm të gazit natyror dhe vendi nuk është i lidhur me asnjë nga rrjetet rajonale të gazit natyror. Gjithashtu, vendi ynë, së bashku me Malin e Zi dhe Kosovën është i vetmi vend në Evropën kontinentale, jo i lidhur me sistemet ndërshtetërore të transmetimit të gazit dhe ka një sistem kombëtar të shpërndarjes së gazit plotësisht të izoluar dhe të pazhvilluar.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.