Përdorimi i jashtëligjshëm i Bitcoin – Europa kërkon të fusë valutën dixhitale brenda kuadrit rregullator
Qeveritë në Europë po përpiqen që të fusin brenda kuadrit rregullator bitcoin, ndërkohë që valuta më e famshme dixhitale po përdoret nga pastruesit e parasë dhe trafikuesit e lëndëve narkotike.
Ministri francez i Financave, Bruno Le Maire tha se do t’i kërkojë homologeve të tij të G20-ës, për të konsideruar një rregullim të përbashkët për bitcoin.
Shqetësimet e tij janë reflektuar edhe në vendet e tjera anëtare. Propozimet e ministrit francez erdhën ndërsa kontrata “futurës” për bitcoin nisën të tregtohen në bursën tregtare të Chicagos, CME.
Në nisje të ditës së Hënë, vlera e 1 bitcoin arriti në 19,220 dollarë. Departamenti i Thesarit në Britani bëri të ditur në muajin e kaluar se po negocion me partnerët në BE, për të hetuar platformat e këmbimit të parasë virtuale dhe ofruesit e portofolit për pastrim të parasë.
Dy fitues të çmimit nobel për ekonomi e kritikuan bitcoin muajin e kaluar. Joseph Stiglitz tha se valuta nuk kryen ndonjë funksion të dobishëm shoqëror, ndërsa Robert J. Shiller tha se bitcoin tërheq njerëzit që duan të anashkalojnë sistemin.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.