Përfitimet e bursës – Mundëson investime me kthim më të lartë
Hapja e bursës do të japë mundësi për të diversifikuar portofolin për investitorët individualë, por edhe për ata institucionalë, si fondet e investimit.
Në një intervistë për TV SCAN, Artan Gjergji, drejtor i Bursës Shqiptare të Titujve, thotë se bursa do të garantojë mundësi për kthime më të larta nga investimi. Obligacionet e kompanive shqiptare do të ofronin përfitime më të larta në raport me instrumentet e deritanishme financiare.
“Qoftë po ta shohësh në këndvështrimin e institucioneve financiare fillimin e funksionimit të bursës shqiptare të titujve, normalisht do të jetë një hap tjetër shumë pozitiv në drejtim të zhvillimit ekonomik të vendit. Këtu pastaj mund të shtojmë edhe pjesën e benefiteve që ka biznesi nga ana e tij. Në qoftë se deri dje biznesi si alternativë të financimit të aktivitetit të tij kishte ose riinvestimin e fitimit ndër vite, ose derën e bankës, tashmë do të ketë edhe një alternativë tjetër që është emetimi i titujve në bursën shqiptare dhe të ftojë publikun të behët ose bashkëaksioner, ose huamarrësh dhe huadhënës në marrëdhënie me biznesin shqiptar”, u shpreh Gjergji.
Shqiptarët kanë investuar mbi 100 milionë euro në fondin e investimeve Raiffeisen Invest, para të cilat janë investuar, mes të tjerash, edhe në tituj të qeverive dhe korporatave të huaja. Hapja e Bursës do të mundësojë investime me kthim më të lartë edhe në tregun vendas, përfshirë sidomos obligacionet apo aksionet e korporatave.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.