Përfitimi nga lehtësitë fiskale – Tatimet udhëzojnë: Hotelet të regjistrohen më vete 

Përfitimi  nga lehtësitë fiskale që do tu bëhet strukturave turistike nga ndryshimet në ligjin për TVSH, kërkon edhe një hap të ri  nga këto subjekte. Nëpërmjet një njoftimi zyrtar, Administrata Tatimore iu bën me dijë të gjithë personave të tatueshëm, të cilët, përveç veprimtarisë në fushën e strukturave akomoduese, kryejnë edhe veprimtari të tjera, të regjistrohen në Qendrën Kombëtare të Biznesit si persona të tatueshëm më vete.

Kjo pritet të sjellë një riorganizim  të  veprimtarive  ekonomike. Sipas njoftimit, ky proces vlen për të përfituar nga lehtësitë fiskale në fushën e turizmit e synon formalizimin e këtij sektori.

Ndërkohë  që këto  struktura do të përfitojnë nga ulja e TVSH në fjetje  nga 20 % në 6 %, i miratuar në gjysmën e parë të këtij viti.  Po sipas Tatimeve regjistrimi në Qendrën Kombëtare e Biznesit duhet të kryhet brenda 3 muajve nga hyrja në fuqi e këtij vendimi.

Ky vendim  është botuar në Fletoren Zyrtare nr.200,  dhe ka hyrë në fuqi që nga data 05.12.2017. Edhe pse ky sektor ka njohur rritje gjatë viteve të fundit, nuk ka një statistikë të saktë  se sa është numri i strukturave akomoduese në vendin tonë.

Ndërkohë  që ky lehtësim fiskal, pritet të sjellë  një  statistikë  reale të këtyre njësive ekonomike, por dhe uljen e informalitetit të lartë që e ka shoqëruar këtë sektor.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.