Performanca e UniCredit – Rezultati më i mirë për tremujorin e parë që prej vitit 2007
Banka më e madhe në Itali, UniCredit, publikoi rezultatin më të mirë për tremujorin e parë që prej vitit 2007 dhe deklaroi se do të ulë barrën e kredive të këqija më shpejtë se sa pritej më parë. UniCredit raportoi një fitim neto prej 1.1 miliardë euro, sipër projeksioneve prej 766 milionë. Të ardhurat u rritën me 4% nga tremujori i kaluar, në 5.1 miliardë euro, nxitur kryesisht nga tarifat ndërkohë që të ardhurat neto nga interesat ranë lehtë. Reduktimet në vlerën e librit të kredive ranë më shumë se ç’pritej, në 496 milionë euro.
UniCredit ka ndërmarrë një plan të ristrukturimit që kur punësoi kreun ekzekutiv Jean Pierre Mustier në mes të 2016-ës. Institucioni shtoi kapitali me 13 miliardë euro në fillim të vitit të kaluar, për të financuar pastrimin e bilancit. “Rezultati për tremujorin e parë shënon një progres për planin e ristrukturimit”, tha kreu ekzekutiv. UniCredit deklaroi se pret që kreditë e këqija të arrijnë në një total prej 37.9 miliardë euro në fund të 2019-ës, duke përmirësuar objektivin e mëparshëm.
Bankat italiane kanë humbur miliarda euro prej kredive që janë kthyer në jo-performuese për shkak të recesionit të gjatë. Unicredit planifikon të shesë 4 miliardë euro kredi të këqija këtë vit, pas shifrës optimiste prej 16 miliardë euro në vitin 2017. Banka bëri të ditur se raporti i mjaftueshmërisë së kapitali (CET1) qëndroi në 13.06%, pas zbatimit të një rregulli të ri kontabël që i kërkon huadhënësve që të regjistrojnë humbjet e pritura.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.