Përfshirja ekonomike e femrave/ BB: Shqipëria e 35-ta në botë, lë pas SHBA-të, Zvicrën apo Japoninë
Një ndër drejtimet ku Shqipëria performon më mire në nivel global është barazia gjinore. Raporte të ndryshme e vlerësojnë vendin tonë ndër të parët në botë e Europë në këtë drejtim. Në një raport të sapo publikuar nga Banka Botërore, Shqipëria renditet në vendin e 35-të në botë në drejtim të barazisë gjinore në ligj dhe biznes për femrat.
Në total në analizë merren 190 shtete dhe vendi ynë grumbullon 91.3 pikë, duke lënë pas edhe vende si Shtetet e Bashkuara të Amerikës, Zvicra, Japonia, Bullgaria apo Rumania, sa për të përmendur disa. Në krahasim me rajonin, Serbia dhe Kosova janë më mirë se ne, ndërkohë që Bosnje Hercegovina, Maqedonia e Veriut dhe Mali i Zi janë më keq në renditje.
Krahasuar me një vit më parë, renditja është e njëjta, ndërkohë që pikëzimi është përmirësuar lehtë. Indeksi ka për qëllim të tregojë se në cilat drejtime ligji lehtëson pjesëmarrjen ekonomike të femrave. Për këtë qëllim janë marrë në analizë 8 nën-indikatorë. Në 6 prej tyre, vendi ynë grumbullon pikët maksimale, 100 të tilla, dhe ato janë: lëvizshmëria, vendi i punës, paga, martesa dhe asetet.
Ndërkohë, në atë të pensioneve grumbullon vetëm 50 pikë dhe në atë të prindërimit, 80 të tilla. Pikët e ulta në drejtim të pensionit janë rrjedhojë kryesisht e mungesës së pensionit për një pjesë të madhe të femrave, kryesisht në zonat rurale, ku vetëpunësimi ka krijuar një hendek të madh. Në nivel global, në vend të parë renditet Belgjika, e ndjekur nga Kanadaja dhe Danimarka.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.