Përfundojnë punimet në shkollën e Shkallë-Dajt, Veliaj apel biznesit: Kontribuoni
Bashkia e Tiranës dhe nisma “Fundjava ndryshe” kanë përfunduar rikonstruksionin e shkollës në fshatin Shkallë-Dajt dhe pajisjen me bazën e nevojshme materiale të shkollës. Kryebashkiaku, Erion Veliaj, vlerësoi cilësinë e punimeve dhe theksoi se ajo është ndërtuar me të njëjtat parametra si shkollat e Tiranës.
“Sot jemi në shkollën më të vogël të bashkisë së madhe të Tiranës, ndërkohë që vitin e filluam në shkollën më të madhe të bashkisë së Tiranës, te gjimnazi “Qemal Stafa”, me rikonstruksionin e godinës. Shkolla e fshatit Shkallë ka më pak nxënës se klasa më e vogël në Tiranë, por ka një parim: Një për të gjithë, të gjithë për një. Që do të thotë se duhet të ofrojmë të njëjtin shërbim, si në qendër të Tiranës, si në Bllok, si brenda Unazës, si në zonat periferike, deri në stacionin tonë të fundit që është shkolla e fshatit Shkallë”.
Kryebashkiaku ftoi edhe bizneset dhe këdo tjetër që ka mundësi, të kontribuojnë për të ndihmuar qytetin për ta bërë atë më të mirë, ndërsa theksoi se dy vitet e dyta të mandatit të tij në krye të Bashkisë së Tiranës do të jenë të fokusuara veçanërisht tek zhvillimi i infrastrukturës në fshat.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.