Përfundon me sukses programi ‘youarecredins 1’, së shpejti hapen aplikimet për programin nr.2
Ka përfunduar me sukses programi ‘youarecredins’, në të cilën aplikuan afro 500 studentë për t’u bërë pjesë e familjes së madhe të Credins Bank. Një rrugëtim i suksesshëm prej afro 4 muajsh është finalizuar dje pranë degës qendrore të bankës Credins, në prani të drejtuesve të lartë të bankës.
Zv. Drejtoresha e përgjithshme, znj. Monika Milo uroi të gjithë studentët fitues që arritën në finale duke shpërndarë certifikatat përkatëse të diplomimit.
“Një mundësi mjaft e mirë për të filluar karrierën tuaj profesionale ne industrinë bankare dhe veçanërisht në bankën Credins, por dhe përsa i takon njohurive mjaft të mira të fituara përgjatë gjithë procesit të trajnimit nga ekspertët më të mirë të bankës dhe të jashtëm” tha znj. Milo në hapje të ceremonisë.
Studentët që përfunduan me sukses programin, janë tashmë pjesë e Credins Bank dhe të lumtur që i bashkohen stafit profesionalist të kësaj banke, për të cilën ata patën mundësinë t’i falënderojnë, për mbështetjen dhe njohuritë e transmetuara.
“Ka qenë eksperiencë tepër e bukur. Unë kam studiuar gazetari si shkollën time të parë dhe për mua ndoshta ka qenë një sfidë pak më e madhe se kolegët e mi, që vinin nga shkolla e ekonomikut apo juridikut. Kam mësuar shumë, realisht e them dhe sot ndihem sikur kam bërë një universitet të plotë 5 vjeçar për financë- bankë” tha Erisa Peçi, emëruar si analiste kredie për individë, pranë Credins.
“Jam pranuar si pjesë e Credins Bank ku dhe jam analist kredie mikro. Jam shumë i lumtur. Është një punë që vërtet e dua shumë dhe shpresoj që ëndrra ime të vazhdojë në këtë bankë” u shpreh Saimir Gazidede, emëruar si analist mikrokredie në Credins.
“Jam pjesë e familjes Credins, sepse që në fillim ne edukohemi që jemi të gjithë një familje dhe jam shumë e lumtur për të nisur karrierën time, me misionin tim kryesor, për të dhënë sa më shumë nga vetja në këtë bankë” tha Oltjana Grabovaj, emëruar si specialiste pranë burimeve njerëzore të Credins.
Credins Bank ka në fokusin e tij mbështetjen e vazhdueshme të studentëve duke u krijuar mundësi trajnimi dhe punësimi. Sikurse sot, banka Credins numëron 902 të punësuar, duke u renditur në një nga punëdhënësit kryesor në vend.
Objektivi i Credins Bank vazhdon të jetë krijimi i vazhdueshëm i mundësive sa më të mira për studentët e talentuar, si krijimi i hapësirave për trajnime dhe praktika pune të vazhdueshme, për këdo që do të ketë një eksperiencë bankare.
Programi “youarecredins’, që nga lançimi i tij në Janar 2019, kaloi në disa faza interesante, duke përshirë një përzgjedhje inovative nëpërmjet një testimi online, vlerësim të punës në grup, intervista individuale etj.
Rreth 42 studentë të Shkencave Ekonomike, Drejtësisë, Teknologjisë së Informacionit dhe Gazetarisë Ekonomike, ndoqën këtë program ku pati një gërshetim mjaft interesant midis trajnimeve teorike nga ekspertë të industrisë, si dhe praktikës nëpër departamentet e ndryshme të bankës.
“Me kënaqësi njoftoj që programi i dytë ‘youarecredins’ do të nisë sërish në muajin tetor dhe me datë 22 shtator hapen aplikimet. Mirëpresim të gjithë studentët të cilët janë diplomuar në shkencat ekonomike, drejtësi, gazetari ekonomike dhe gazetari ekonomike, me mesatare mbi 8, të aplikojnë në këtë program në webfaqen e Credins, por për detaje dhe të dhëna të tjera mund të shikojnë dhe të ndjekin bankën, qoftë ne mediat sociale qoftë në website-in e Credins” tha Segi Alushi, përfaqësuese e njësisë së trajnimeve dhe rekrutimeve.
‘Youarecredins’ nr. 1 krijoi një traditë për bankën Credins, dhe së shpejti lançohet ‘youarecredins’ 2, i cili demonstron mbështetjen e mëtejshme të bankës Credins për të gjithë studentët e talentuar që kanë dëshirë të aplikojnë dhe të bëhen pjesë e këtij programi mjaft interesant.
Jenida Vladi/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.