Përfundon skanimi i HEC-eve/ Do ndërpriten 27 kontrata me 80 HEC, Bonati: Minimizojmë rreziqet për buxhetin
27 kontrata, që parashikonin ndërtimin e 80 hidrocentraleve janë gjetur me shkelje të rënda kontraktuale, që nuk kanë filluar punime në terren, kanë filluar të ndërtojnë pa leje, ose janë braktisur për një kohë të gjatë”. Ky është një prej përfundimeve të dalë nga procesi i vlerësimit të ecurisë dhe zbatimit të kontratave, i nisur nga Ministria e Infrastrukturës dhe Energjisë në fund të muajit janar, për të cilat do të bëhet prishja e njëanshme e kontratave.
“Për të gjithë këto praktika nga ana jonë do të vijohet me procesin e komunikimit me subjektin për ndërprerjen e kontratës në mënyrë të njëanshme duke ju referuar shkeljeve të neneve të saj dhe sipas procedurës ligjore të parashikuar. Sikurse theksuar në çdo komunikim publik, procedura që do ndiqet nga strukturat teknike dhe ligjore, nga njoftimi i fillimit të procedurës, deri në ndërprerjen e njëanshme të kontratës, do të jetë shumë e kujdesshme për të minimizuar çdo risk financiar që mund t’i shkaktohet buxhetit të shtetit” u shpreh Hantin Bonati, Zv. Ministër i Infrastrukturës dhe Energjisë.
Ndërkaq, përveç këtyre kontratave, 20 të tjera rezultojnë se nuk kanë nisur ende punimet apo kanë vënë në punë vetëm një pjesë të hec-eve të parashikuar në kontratë.
“ Problematikat e mësipërme janë shkaktuar si për arsye të burokracive administrative, apo rrethanave që nuk varen nga subjekti. mospërmbushjes/ neglizhencës/ paligjshmërisë në veprim të subjektit. Përsa i përket vijimit të trajtimit të këtyre praktikave do të jetë: nëse këto problematika janë shkaktuar nga vonesat burokratike administrative, do të vijohet me një proces negociimi me subjektet me qëllim rishikimin e kontratës brenda kuadrit ligjor, për vendosjen e palëve në legjitimitet sa i takon afateve, apo kushteve të tjera kontraktuale. nëse këto problematika vijnë si pasojë e veprimeve, apo mosveprimeve të subjekteve, do të vijohet me penalitete e deri në fillimin e procedurës për ndërprerjen në mënyrë të njëanshme të kontratës” tha Bonati.
Ndërkaq, 101 kontrata të tjera, të cilat pasashikojnë ndërtimin e 153 hidrocentarleve subjektet, janë ende brenda afateve kontraktuale për të vënë në funksion veprën. Në këto raste, ministria do i përcjellë çdo subjekti një shkresë ku do t’i përcaktohen: afatet e mbetura në dispozicion për të reskeptuar kontartën, penalitetet për shkeljet e konstatuara si dhe penalitetet apo masat me të cilët do të përballen në rast të mosrespektimit të kushteve në vijim.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.