Përgjysmohet prodhimi i energjisë – Importet janë rritur me pesë herë këtë vit

Prodhimi i energjisë elektrike u përgjysmua në 6-mujorin e parë të vitit. Të dhënat e Institutit të Statistikave konfirmojnë një bilanc energjetik të përkeqësuar krahasuar me një vit më parë.

Rënia e prodhimit solli ulje drastike të eksporteve dhe rritje të lartë të importeve. Në gjashtë muaj, Shqipëria importoi 683 GWH energji elektrike, rreth pesë herë më shumë krahasuar me gjysmën e parë të vitit të kaluar.

Eksportet energjisë ishin rreth 142 GWH, ndërsa një vit më parë tejkalonin sasinë e 1100 GWH. Një tablo e tillë ishte e pritshme, për shkak të ndryshimit të kushteve hidrike në vend.

Ndryshimet e prodhimit të energjisë elektrike janë një çështje që ndikojnë në mënyrë të ndjeshme ecurinë e parametrave ekonomikë të vendit. Për vitin 2018, prodhimi i lartë i energjisë ishte shtysa kryesore e rritjes ekonomike, sidomos në gjysmën e parë të vitit.

Por, në vazhdim prodhimi ra dhe kjo po reflektohet në shifra dukshëm më të ulëta të rritjes ekonomike. Për tremujorin e parë të këtij viti, përllogaritet se energjia elektrike dha një impakt negativ me 1.6 pikë përqindje në rritjen ekonomike.

Ndërkohë, mbështetur në të dhënat e Instat, tremujori i dytë i vitit ka sjellë përmirësime në treguesin e rëndësishëm të humbjeve në rrjet. Raporti mes humbjeve në rrjet dhe energjisë në dispozicion rezulton 19.7%, ndërsa një vit më parë kishte qenë 22.4%.

Megjithatë, ajo që vërehet është një rritje e humbjeve jo teknike, që konsistojnë kryesisht në vjedhje të energjisë. Në sasi, humbjet jo teknike në shpërndarje janë rritur me 40% krahasuar me vitin e kaluar, ndërsa humbjet teknike kanë rënë me 13%.

Ersuin Shehu / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.