Përjashtimet nga taksa e infrastrukturës/ Zgjerohet baza e përfituesve, lehtësi edhe në kuadër të COVID-19!

Qeveria ka vendosur të zgjerojë bazën e bizneseve që nuk do të paguajnë taksën e ndikimit në infrastrukturë për ndërtimet e reja. Referuar projektligjit për “sistemin e taksave vendore”, të depozituar për diskutim në komisionet parlamentare, ligji përjashton nga pagesa e taksës së ndikimit në infrastrukturë investimet për rindërtimin, riparimin apo restaurimin e ndërtesave të destinuara për qëllime banimi, të dëmtuara si pasojë tërmetit të 26 Nëntorit 2019.

Në relacion thuhet se kjo bazë është zgjeruar edhe në kuadër të fatkeqësisë natyre të COVID-19,e cila ka impaktuar veprimtarinë e operatorëve ekonomik  si rezultat i mbylljes së veprimtarisë së bizneseve në fushën e shërbimeve, të turizmit etj,  reduktimit të theksuar të veprimtarisë prodhuese në jo pak sektorë, reduktim të konsumit të karburanteve për shkak të kufizimeve në lëvizjen e tyre, etj. Kështu, propozohet si emergjencë përjashtimi nga pagesa e taksës së ndikimit në infrastrukturë edhe për investimet të cilat nuk janë vetëm në kuadër të investimeve për rindërtimin, riparimin apo restaurimin e ndërtesave të destinuara për qëllime banimi, por përfshihen edhe programi i objekteve të reja dhe programi i ndërtimit të infrastrukturës publike dhe të infrastrukturës kritike.

Pra përfitues të këtij lehtësimi, nuk do të jenë vetëm bizneset e prekura nga tërmeti por edhe ata që janë prekur nga fatkeqësi të tjera natyrore, siç është në rastin konkret koronavirusi. Kjo taksë, aplikohet përpara dhënies së lejes së ndërtimit, ku si bazë e taksës është sipas rastit vlera në lekë e investimit të ri që kërkohet të kryhet sipas preventivit, ose vlera në lekë e çmimit të shitjes për metër katror të investimit të ri.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.