Përjashtimi nga ndihma ekonomike, Basha: Në Shqipëri ka varfëri dhe nuk ka punë
Kryetari i Partisë Demokratike, Lulzim Basha publikoi shifrat zyrtare të familjeve në ndihmë ekonomike, të përjashtuarve nga ndihma dhe vendeve të punës që ofrojnë zyrat e punës.
Të dhënat për vendet e punës, kreu i PD-së i ka marrë më 19 mars ne websiten e Shërbimit Kombëtar të Punësimit.
Sipas të dhënave rezulton se në vendin tonë janë mbi 50 mijë familje me ndihmë ekonomike, mbi 28 mijë familje të tjera janë përjashtuar nga ndihma ekonomike ndërkohë që janë vetëm 454 vende të lira pune.
Sipas Bashës ”Kryeministri Rama do të përjashtojë nga ndihma ekonomike këdo që refuzon një punë. Por e vërteta është se punë nuk ka.”
Opozita është kundër përjashtmit të familjeve në nevojë nga skema e ndihmës ekonomike, ndërkohë që sipas qeverisë nga kjo skemë janë përjashtuar vetëm abuzuesit.
Në seancën e 15 marsit ku u diskutua për ndihmën ekonomike LSI propozoi rritje të ndihmës ekonomik me dy dollarë në ditë për çdo anëtar të familjeve në nevojë.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.