Përjashtohen nga vetëkontrolli – Kategoritë e bizneseve ushqimore që përfitojnë dhe kriteret
Operatorë të veçantë në biznesin ushqimor do të përjashtohen nga detyrimi për të zbatuar sistemin e vetëkontrollit, i cili përmban kryerjen e analizave periodike mbi produktet e tregtuara.
Përmes një udhëzimi të posaçëm i cili tashmë ka marrë fuqi ligjore, Ministria e Bujqësisë, ka vendosur që përjashtimi nga ky sistem do të bëhet me kërkesë të operatorëve dhe këtë kërkesë mund ta bëjnë operatorë të vegjël ushqimorë që tregtojnë sasi të vogla produktesh ushqimore, kategori të veçanta operatorësh, si dhe prodhues të produkteve tradicionale.
Operatorë të vegjël ushqimor janë individë ose bashkim individësh të cilët shesin direkt për konsumatorin produktet e prodhuara prej tyre në sasi të vogla produktet primare dhe/ose të përpunuara me origjinë shtazore dhe joshtazore. Udhëzimi përcakton se këto produkte mund të tregtohen direkt te konsumatori i fundit, në portën e fermës së tij, në tregun lokal, në, restorantet, bujtinat e hotelet brenda territorit të njësisë administrative. Produktet primare shiten direkt në evente të tilla, si: tregje ditore, panaire, festa fetare etj.
Udhëzimi detyron operatorët e biznesit ushqimore që në kuadër të sigurisë ushqimore të mbajnë të dhëna për gjurmueshmërinë e ushqimit nga prodhuesi te konsumatori.
Ata që duan të përfitojnë nga ky përjashtim, duhet të paraqesin kërkesë me shkrim pranë Ministrisë së Bujqësisë, e cila përmban emër, mbiemër; Adresa; Llojin dhe sasinë e produkteve të prodhuara dhe të produkteve që kërkon të shesë; si dhe vendin e shitjes së produkteve. Ministria kryen verifikimet përkatëse dhe më pas merr një vendim sipas rastit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.