Përkeqësim në indeksin e zhvillimit njerëzor – Shqipëria humbet një pozicion në raportin e UNDP

Shqipëria renditet e 69-të në botë në Indeksin e Zhvillimit Njerëzor të publikuar nga Programi për Zhvillim i Organizatës së Kombeve të Bashkuara ( UNDP ). Në analizë merren 189 vende të ndryshme të botës. Renditja për këtë vit përkthehet në një përkeqësim në klasifikim me 1 pozicion në krahasim me vitin 2018.

Raporti i zhvillimit njerëzor që përmban edhe indeksin HDI, është ndër indekset më të rëndësishme në nivel global, për të mos thënë më i rëndësishmi prej tyre, pasi në bazë të indeksit HDI përpilohen edhe të gjitha raportet e tjera, përfshirë ato të Bankës Botërore, Kombeve të Bashkuara, Fondit Monetar Ndërkombëtar e organizmave të tjerë. Përkeqësimi në renditje të këtij indeksi përkthehet në përkeqësime edhe në raportet e tjera.

Në përpilimin e indeksit merren për bazë një sërë kriteresh, për të përcaktuar nivelin e zhvillimit të një popullsie të caktuar, si; të ardhurat për frymë, shkollimi, jetëgjatësia, pabarazia ekonomike, etj. Raporti i Organizatës së Kombeve të Bashkuara është një ndër raportet më gjithëpërfshirëse, pasi bëhen renditje për thuajse çdo sektor.

Në krahasim me rajonin, Shqipëria renditet në pozita të mesme, duke lënë pas Bosnje Hercegovinën dhe Maqedoninë e Veriut, por duke u renditur më keq se Serbia apo Mali i Zi. Që prej vitit 1990, Shqipëria ka njohur një rritje konstante në këtë indeks, duke shtuar bindshëm pikët. Në nivel global, në vend të parë renditet Norvegjia.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.