Përkeqësohet liria e medias – RSF: Sulme të paprecedenta në 2018 nga qeveria shqiptare dhe krimi i organizuar

Liria e medias në Shqipëri është përkeqësuar ndjeshëm, thotë “Reporterët pa kufij” në indeksin më të fundit të “Lirisë së Medias në Botë 2019”. Në bazë të indeksit, rezulton se, Shqipëria renditet e 82-ta në botë, ndër 180 shtete. Në krahasim me një vit më parë, Shqipëria ka humbur plot 7 pozicione në renditjen e përgjithshme.

“Reporterët pa kufij” e sqaron edhe me rreshtave, përse-në e kësaj rënie. “Sulmet ndaj medias, si nga qeveria ashtu edhe nga krimi i organizuar prekën nivele të paprecedenta gjatë 2018-ës, thuhet mes rreshtave.

Profili për Shqipërinë vijon duke theksuar se, gazetarët ishin subjekt ofendimesh, kërcënimesh me vdekje si dhe kërcënime të tjera për t`i mos lejuar ata të investojnë mbi çështje korruptive. “Politikanët, të drejtuar nga Kryeministri Rama, i kanë cilësuar gazetarët si mbeturina dhe fabrikues lajmesh të rreme, thuhet më tej. Edhe propozimi i Kryeministrit për një ligj të ri mbi median elektronike, vlerësohet se do të ketë efekt në kufizimin e informacionit.

Përkeqësimi me 7 vende ka bërë që në renditjen rajonale, Kosova të ngjitet sipër Shqipërisë. Bosnje Hercegovina vijon të jetë e para në rajon, ndërkohë që vendet e tjera janë ende prapa, pavarësisht rritjes së Maqedonisë së Veriut me 14 pozicione. Norvegjia, Finlanda dhe Suedia janë tre vendet me lirinë më të madhe të medias në botë, thotë indeksi i këtij viti i “Reporterëve pa kufij”.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.