Përkeqësohet liria e shtypit – Bie në 2018, por Shqipëria ngjitet me një pozicion në indeks

Shqipëria i`a ka dalë të fitojë vetëm 1 pozicion në indeksin e lirisë së shtypit 2018, nga Reporterët Pa Kufij. Në renditjen e këtij viti, Shqipëria pozicionohet në vendin e 75-të ndër 180 shtete në çdo cep të globit. Një vit më parë renditej e 76-ta dhe fitonte 6 pozicione në renditjen e përgjithshme.

Por, pavarësisht ngjitjes me një pozicion në renditje, liria e shtypit në Shqipëri është përkeqësuar në krahasim me një vit më parë. Shqipëria grumbullon këtë vit më pak pikë se një vit më parë, çka e ilustron mjaft mirë përkeqësimin. Në rajon, Shqipëria lë pas vetëm Kosovën dhe Serbinë, me këtë të fundit që ka humbur 10 pozicione në krahasim me një vit më parë.

Përfshirja e vendit tonë në zonën portokalli do të thotë se, klasifikohet si një vend problematik në drejtim të lirisë së shtypit. Në nivel global, Norvegjia, Suedia dhe Holanda zënë kreun e listës ndërkohë që në vend të fundit renditen Turkmenistani, Eritrea dhe Korea e Veriut.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.