Përkeqësohet ndjesia ekonomike – Treguesi, në rënie gjatë gushtit pas disa muajsh rritje

Treguesi i ndjesisë ekonomike (TNE) regjistrohet në rënie të lehtë gjatë muajit gusht, tregojnë të dhënat e vrojtimit të besimit konsumator, të publikuara nga Banka e Shqipërisë. Kështu, ky tregues ka rënë me 0.6 pikë gjatë gushtit, pranë nivelit të 109.8 pikëve. Indikatori regjistrohet në rënie për të parën herë pas disa muajsh, sinjalizojnë shifrat.

Kjo rënie ka ardhur kryesisht si pasojë e besimit në sektorin e tregtisë, dhe disi në atë të industrisë, ndërkohë që të gjithë nën-indikatorët e tjerë janë regjistruar në rritje, përfshirë edhe atë të besimit konsumator. Treguesi i besimit në tregti ka pësuar një rënie me 13.5 pikë përqindje, që është edhe rënia e parë që prej fillimit të pandemisë, në muajt e parë të vitit 2020. Treguesi i besimit në industri ndërkohë ka pësuar një rënie prej 0.9 pikësh përqindje, sinjalizojnë shifrat zyrtare nga raporti i vrojtimit të Bankës së Shqipërisë.

Treguesit e besimit në shërbime dhe në ndërtim ndërkohë janë rritur me nga 0.8 pikë përqindje secili gjatë gushtit. Ndërkohë, sa i përket besimit konsumator, ky tregues është rritur lehtë gjatë gushtit, por duke vijuar të qëndrojë nën mesataren historike afat-gjatë. Ky tregues është i vetmi që vijon të mbetet nën mesataren hitsorike, çka sinjalizon se konsumatorët vijojnë ta ndjejnë krizën, si në të tashmen, ashtu edhe në perceptimin për të ardhmen. Sa i përket të ardhmes, konsumatorët presin një përmirësim të situatës gjatë 12 muajve në vijim, në drejtim të çmimeve, papunësisë por edhe blerjeve të mëdha.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.