Përmbaruesit, mbikqyrja nga privati – Udhëzimi i Ministrisë: Ekspertë nga jashtë për të kontrolluar përmbarimin privat

Duket se Ministria e Drejtësisë ka vendosur t’i kalojë ekspertëve privatë kompetencën për mbikqyrjen e aktivitetit të përmbaruesve gjyqësorë privatë. Përmes një udhëzimi që mban datën 17 Korrik, Ministria e Drejtësisë ka përcaktuar kriteret dhe procedurat e përzgjedhjes dhe shpërblimit të ekspertëve të jashtëm të pavarur, të cilët angazhohen për kryerjen e kontrollit të veprimtarisë së përmbaruesve gjyqësorë privatë, në rastin e mungesës së burimeve njerëzore në strukturën përgjegjëse në ministri, si dhe mbulimit të fushave specifike.

Udhëzimi përcakton se Ministria e Drejtësisë miraton jo më vonë se data 10 shkurt të çdo viti kalendarik, një listë me jo më pak se 25 (njëzet e pesë) ekspertë të jashtëm të pavarur, që mund të angazhohen për kryerjen e kontrolleve, të përzgjedhur sipas procedurave të përcaktuara. Ata do të paguhen nga Ministria 7 mijë lekë për çdo ditë pune të angazhuar për llogari të saj.

Eksperti do të ketë detyrë të njihet me materialet e çështjes për inspektim; t’i bëjë pyetje përmbaruesit, përfaqësuesit ligjor të zyrës përmbarimore ose çdo punonjësi tjetër të zyrës përmbarimore, pranë të cilit bëhet inspektimi, sipas fushës specifike për të cilën është angazhuar eksperti në këtë inspektim; të japë shpjegime; të kërkojë e të marrë të dhëna nga të tretët, brenda kufijve të nevojshëm për kryerjen e detyrës.

Ministri i Drejtësisë i kërkon ekspertit të pavarur që të japë përfundimet e ekspertimit, sipas detyrave të dhëna në fillim të inspektimit, në një raport me shkrim, ku duhet të gjejnë pasqyrim edhe vërejtjet apo kërkesat e nëpunësit të structures përgjegjëse për inspektimin në Ministrinë e Drejtësisë, pjesë e ekipit të inspektimit apo edhe të përmbaruesit ndaj të cilit kryhet inspektimi. Në rastin e të metave, vërejtjeve apo paqartësive të mundshme, ministri i Drejtësisë mund të kërkojë sqarime plotësuese ose të urdhërojë kryerjen e një ekspertimi të ri, duke thirrur ekspertë të tjerë të pavarur nga lista e ekspertëve.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.