Përmbytjet – KKECK: Situata do të vijojë të mbetet e rëndë
Në vendin tonë ka vijuar mot me reshje shiu, por intensiteti i tyre po bie. Sipas Komunitetit të Koordinimit të Emergjencave Civile dhe Krizave, rreziku paraqitet më së shumti në pellgun e lumit Vjosë, kryesisht në Vlorë dhe Fier.
Nga të dhënat bëhet me dije se evakuimi i qytetarëve nga zonat e rrezikuara ka vijuar. Por, sipas KKECK, ka pasur edhe raste ku disa prej tyre janë përpjekur të bëjnë rezistencë. Po ashtu, përveç qytetarëve, nga zonat e rrezikuara janë larguar edhe shumë krerë bagëti.
Sipas raportit Vjosa ka çarë argjinaturën në afërsi të Mifolit dhe vërshuar drejt fshatrave Fitore, Bishan, Perras, Poro dhe Frakull. Aksi më problematik paraqitet ai Tepelenë – Gjirokastër. Gjithashtu, po punohet për zhbllokimin e akseve Tepelenë-Këlcyrë, Përmet-Çarshovë dhe Vlorë-Selenicë, ndërsa në akse të tjera po punohet për eliminimin e rrëshqitjeve të dherave.
Rreth 45 mijë abonentë kanë mbetur pa energji, ndërkohë që nga të dhënat bëhet me dije se OSHEE po punon për stabilizimin e gjendjes në nënstacionet e Zëmblakut, Maliqit, Radhimës dhe Memaliajt. Nga avaritë gjatë natës janë dëmtuar ujësjellësit e Krujës, Ballshit dhe Bishqemit Fushë.
Sipas Komunitetit të Koordinimit të Emergjencave Civile dhe Krizave situata do të vijojë të mbetet e rëndë. Ai u bën apel qytetarëve që të bashkëpunojnë me autoritetet shtetërore , sidomos me ato që lidhen me evakuimin në mënyrë që të shmangen pasojat e rënda.
Më poshtë janë edhe instruksionet e dhëna lidhur me masat e sigurisë që të gjithë qytetarët duhet të kenë parasysh.
Komiteti i Koordinimit të Emergjencave Civile dhe Krizave ju bën thirrje të gjithë qytetarëve për kujdes të shtuar gjatë situatës së reshjeve dhe përmbytjeve, duke pasur vëmendje sidomos në këto drejtime:
- Kujdesi për jetën mbetet prioriteti i dorës së parë. Të gjithë duhet të shmangin sa më shumë të jetë e mundur udhëtimet në zonat e prekura nga reshjet, qëndrimin në afërsi të lumenjve e përrenjve, qëndrimin afër shtyllave apo objekteve të tjera të larta që mund të goditen nga shkarkesat elektrike etj..
- Qytetarët që banojnë shumë pranë shtretërve të lumenjve, në afërsi të digave apo në zona që historikisht rrezikojnë përmbytje, duket të shtojnë kujdesin për jetën dhe të jenë në gatishmëri për të bashkëpunuar me strukturat e emergjencave civile në rast të nevojës për evakuim të përkohshëm.
- Kërkohet të shmangen në maksimum udhëtimet në këmbë apo me automjete në zonat e prekura apo me rrezik të prekjes nga përmbytjet.
Një rrymë uji rreth me thellësi rreth 20 centimetra mund të rrëzojë një kalimtar, ndërkohë që një rrymë më thellësi prej 30 centimetrash mund të rrëmbejë automjetin tuaj gjatë udhëtimit.
- Duhet të shmangen në maksimum kalimet në urat e lumenjve me prurje të shtuar dhe rryma të fuqishme.
- Në situata rrymash të parapritura, duhet të kërkoni më shpejtësi një vend të lartë për t’u ruajtur.
- Në se niveli i ujit në afërsi të automjetit tuaj rritet, por nuk lëviz, duhet të lini automjetin për të gjetur një vend më të lartë. Por, mos e braktisini automjetin për t’u futur në një rrymë të fortë uji.
- Shmangni parkimin e automjetit në afërsi të lumenjve apo përrenjve gjatë reshjeve të rënda, pasi ato mund të përmbyten shumë shpejt.
- Shmangni qëndrimin apo parkimin në rrugët që janë në buzë të lumenjve. Shpesh herë ujërat mund të gërryejnë bazamentin e rrugës, duke e bërë atë të rrezikshme.
- Mbani të hapur radion apo televizorin për të marrë njoftimet që mund të jepen nga autoritetet kompetente.
- Mbani në gatishmëri mjete e komunikimit, sidomos telefonat celularë, duke siguruar gatishmërinë e baterive;
- Mbani në gatishmëri mjete të ndihmës së shpejtë, medikamente të domosdoshme, mjete ndriçimi etj..,
- Futini në mjedise të mbyllura orenditë apo mjete të tjera që zakonisht i mbani jashtë. Mundësisht vendosini orenditë në pika të larta brenda shtëpisë për të parandaluar dëmtimin gjatë përmbytjeve;
- Shkëputni sa më shumë pajisje elektrike nga rrjeti dhe mos i prekni ato nëse janë në lagështi ose nën ujë;
- Kini kujdes nga goditjet elektrike që mund të vijnë nga rënia e telave të tensionit në pellgjet me ujë.
- Njoftoni në numrin 112 apo në çfarëdo forme tjetër komunikimi për problemet që mund të keni.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.