Përmbytjet, krerët e politikës në terren. Rama vlerëson situatën të menaxhueshme, Basha: “Jo politikë, të merren masa”
Intensiteti i shirave dhe situata e krijuar ka nxjerrë në terren krerët e politikës. Kryeministri Edi Rama ka qenë në Lezhë për të monitoruar situatën me përmbytjet. I pranishëm ishte edhe kryetari i Bashkisë Lezhë, Pjerin Ndreu, i cili bëri një pasqyrim të situatës në vend, ku më problematike është lagja Varosh
“Lagjja Varosh ka pësuar shkarje masive, janë rrezikuar disa shtëpi kemi evakuuar gjithë banorët por procesi është i rrezikshëm dhe mund të ketë problematikë për banorët. Po verifikojmë shtëpitë disa janë në proces legalizimi kemi evakuuar dhe një kopsht. Kanë ardhur dhe ekspertë nga Tirana. Situata kërkon ndërhyrje urgjente se mund të agravojë. Të gjithë kanë ndërtuar pa leje, por shumica janë të legalizuara. Një banesë nuk është në proces legalizimi dhe duhet ndërhyrë. Kjo zonë nuk ka qenë e lejueshme për t’u ndërtuar se është e rrezikshme”, theksoi Ndreu.
Rama shprehu gatishmërinë e qeverisë për të ndihmuar familjet që u janë dëmtuar banesat ndërkohë që shtoi se edhe pse niveli i reshjeve ka qenë tepër i lartë dëmet nga përmbytjet janë shumë të vogla falë ndërhyrjeve të bëra në infrastrukturën kulluese duke e krahasuar me përmbytjet e 2010 .
“Sikur mos të kishim bërë gjithë atë punë, do të ishin mijëra familje të evvakuara, sic ndodhi në atë përmbytjen e 2010-ës. Mbrëmë pas gjitha të dhënat, fola dhe me Becin, dhe pashë që intensiteti i reshjeve ishte shumë më i madh. Kur vjen një intensitet i tillë reshjes, jo ne, po as Gjermania apo Parisin nuk ka cfarë bën. Në këtë rast, gjëja më e rëndësishme është që janë mbrojtur banesat. Numrat janë të vegjël, 40 familje që evakuohen është numër shumë i vogël, por me ato do të merremi.”
Kreu i demokratëve, Lulzim Basha është ndalur në Shkodër për tu njohur me situatën. Pasi u njoh me dëmet Basha e vlerësoi situatën të rëndë duke kërkuar marrjen e masave nga ana e shtetit duke filluar që nga transparenca e asaj çfarë po ndodh
“Ndodhem këtu për të qenë pranë qytetarëve të Shkodrës. Situata po përkeqësohet nga ora në orë. Gjithë ultësirën. Situatë e cila i mbivendoset edhe fatkeqësive të tjera, si pandemia. Shqipëria po vuan situatë krizash. Që po na kushtojnë edhe dëme të mëdha, dhe jetë njerëzish. Nuk është koha për politikë, por s’mund të mohohet që gjendja të jetë më e mirëmenaxhuar. Kjo është detyra e shtetit, kam qenë në komunikim të vazhdueshëm me kryebashkiaken e Shkodrës. Situata po vjen duke u përkeqësuar. Duhet transparencë për atë që po ndodh.”
Basha shtoi se PD do të jetë pranë banorëve të zonës për tu ardhur në ndihmë në këtë situatë të vështirë.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.