Përmbytjet nga reshjet intensive, 5 shtete të BE ofruan ndihmë – Në 15 vjet Shqipëria aktivizoi 250 herë mekanizmin e mbrojtjes civile
Reshjet e mëdha të fillimit të dhjetorit detyruan vendin tonë të kërkojë ndihmën e Mekanizmit të Mbrojtjes Civile të Bashkimit Europian.
Nga thirrja e parë më datë 4 dhjetor, e deri më 15 dhjetor, janë pesë shtete anëtarë të cilat ka ofruar asistencën e tyre përmes këtij mekanizmi. Greqia ishte vendi i parë që u përgjigj dhe asistenca u dha më 9 dhjetor.
Për të mbështetur Shqipërinë u angazhuan edhe Sllovenia, me asistencën e dhënë më 11 dhjetor, si edhe Sllovakia, Franca dhe Austria, nga të cilat mbështetja pritet sot dhe më 18 dhjetor. Sakaq, Italia ka dërguar një mision për të vlerësuar kushtet e urave të dëmtuara dhe po shqyrton ofertën e mëvonshme.
Deri më tani asistenca e dërguar pranë Komandës Mbështetëse të Ushtrisë në Vaqarr përfshin: 22 pompa uji; 42 ngrohës; 16 gjeneratorë; 2500 mushama shiu; 2120 batanije; 1000 thasë për fjetje; 301 palë çizme; etj.
Krahas ndihmës së shteteve të ndryshme, vendi ynë u mbështet edhe nga sistemi satelitor Kopernik, i cili siguroi 18 harta për autoritetet vendase.
Që nga viti 2001, vendi ynë ka aktivizuar mbi 250 herë kërkesën për ndihma civile nga 34 shtetet pjesëmarrëse në Mekanizmin e Mbrojtjes Civile.
Por suporti i BE-së nuk bazohet vetëm tek ky mekanizëm, duke dhënë shembull mobilizimin e fondeve për rimëkëmbjen nga përmbytjet dhe parandalimin e tyre që nga viti 2015. Rreth 14.7 milionë euro janë dhuruar për rehabilitimin e infrastrukturave dhe përmirësimin e parandalimit të përmbytjeve, ndërsa pjesa më e madh e këtij fondi ka shkuar për rikuperimin e dëmeve bujqësore.
Shqipëria është përfituese edhe e dy programeve rajonale IPA në këtë fushë: atij të përmbytjeve me vlerë të përgjithshme 6 milionë euro dhe atij të vlerësimit të rrezikut dhe hartëzimit të katastrofave me një fond prej 3 milionë eurosh.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.